高海寧自爆入院原因　鬼剃頭兼頭皮有硬塊

37歲高海寧去年憑劇集《新聞女王》奪最佳女配角，在內地人氣急升，因此經常中港兩邊走。目前正拍攝內地真人騷《無限超越班》第二季，同時在趕拍TVB新劇《武林》。她上月突在IG上載病床照，令人擔心其健康狀況，她日前受訪時就自爆頭皮出現硬塊，又再出現鬼剃頭情況。

高海寧接受TVB娛樂新聞台訪問時透露，當日因為發現硬塊，所以決定入院檢查：「我好突然㗎，我係拍完《無限超越班》嘅通宵之後第二日，坐飛機返嚟，跟住我就喺度按我條頸啦，咦，乜有粒咁大嘅嘢。」

高海寧續指，自己之前一晚凌晨4時多才睡，發現硬塊有痛感：「硬硬地㗎喎仲要係，嗰陣真係比而家凸好多，跟住就好驚啦。摸落去頭皮呢個位，呢兩忽呢係兩大嚿硬塊，跟住痛喎！然之後㗎成個頭皮又㷫，跟住我就死啦，咩事呢？」

除此之外，高海寧更被媽媽發現有鬼剃頭：「我之前試過鬼剃頭兩次，我最近又有咁嘅跡象，咁我知道係壓力，所以其實個心……即係我唔係話好徬徨嘅，但係我知道我要抽時間去醫院Check，咁跟住劇組好好啦，叫我去醫院，即係大家都唔想你有事咁樣，所以就放咗我幾日假去醫院。」

高海寧指，慶幸檢查結果不嚴重，但醫生建議持續檢查及留意情況，並認為她需要休息。可惜她的工作已排滿，亦承認心情亦有影響：「我是好易緊張和焦慮的人，特別係工作咁高強度時，又要時刻保持住100分嘅狀態，會將自己push到好盡，呢樣令我好崩緊、好大壓力，所以我覺得要調返個心態，要放鬆啲。」

高海寧坦言，同時拍參與《無限超越班》及拍劇，連續大半個月於凌晨3、4時才睡，又要舟車勞頓：「好多時都係凌晨一點鐘先收工，五點鐘就出發去機場，要咁樣先趕得切飛返香港開工，好多時一落機就要即刻開工，但係享受嘅，從來都未試過咁忙嘅，其實算唔算係Happy problem呢？都算係嘅，但係要調節返自己嘅心情囉。」

事實她在《無限超越班2》的表現備受內地觀眾讚賞，最新一集與內地小鮮肉王鏘對戲時，更現場真錫咀，令導師吳鎮宇及袁詠儀十分驚喜。