雲浩影今推第3張專輯　新年願望開個人演唱會

雲浩影（Cloud）今日（1月20日）推出第三張個人專輯《TOUCH OF ABSENCE》，以自我成長為題。新碟主題與Cloud的首張專輯《The Cloud》以及第二張專輯《INTRODUCTION to PAIN》互相呼應，講述傷痛過後、沉澱自我再重新出發的過程。為拍攝新碟靚相，Cloud與團隊於凌晨4點出發，成功捕捉美麗柔和的陽光。今次的造型亦較過往性感，Cloud坦言起初有些擔心，但拍攝過後她滿足地表示非常期待成品。

新碟靚相由Miss Bean操刀，是二人繼首張專輯《The Cloud》後再度合作，Cloud直言很欣賞對方的作品。拍攝場地空間寬敞，陽光透過落地大玻璃滲入，非常舒服。Cloud表示今次的拍攝風格與過往不同，更著重空間感，她說：「過往係好多Close up、會有好多唔同嘅衫，今次係更加著重情感、Pose上嘅表達。」

Cloud換上不同造型，分別是搶眼的紅色上衣和透視珠片裙，以及高貴的白色貼身長裙，兩套衫均有若隱若現的感覺。她表示穿搭上作出新嘗試，說：「今次嘅衫的確係比較性感，自己都有少少擔心，有做Gym、打下網球同食少啲Carbs（碳水化合物）。呢啲衫都係我平時比較少着嘅類型，好似呢件紅色衫，我平時好少着紅色，為咗迎合主題就嘗試咗好多唔同顏色，表現到雲唔同嘅面貌同狀態。」

團隊利用水和冰去表達雲不同的狀態，其中一個場景Cloud要躺在玻璃餐枱下，工作人員再從高處倒水至枱上以捕捉唯美畫面，被枱腳包圍的Cloud要在狹窄空間內擺出多個甫士。另外，身穿珠片裙的她亦不時要蹲低或躺下。她說：「辛苦係要用手踭撐住個石屎地，成個身體嘅力放晒喺度，或者要着住珠片裙要做啲姿勢，呢啲片全部都拮入肉，辛苦但值得，好期待想睇到成品。」

踏入2025年，Cloud感恩表示入行第3年能推出第3張個人專輯，她透露新碟內有一首自己很喜歡的英文Cover歌。至於新年願望，她直言是舉行個人演唱會，她笑就：「2025年好開心出咗呢隻碟，更加期待會有大碟，更更更加期待會唔會有自己嘅個人演唱會。入行都一段時間，好想將自己儲落嘅歌，排一個演唱會嘅rundown送畀大家，呢個都係我嘅願望。」