喺拉闊首次表演後，Edan同Jace嘅合唱作《漸漸我們》終於正式派台，淡然地唱出深厚情感，傷感動人。
「一句對不起 難道沒有效期 耐性有限難等你」
一段關係結束唔係一朝一夕嘅事，提出分開嘅一方看似狠心灑脫，其實係經歷過無數次忍耐妥協。內心早已傷痕累累，痛苦地喺淚水中掙扎，將愛日漸磨滅，難以修補，縱使曾經有過快樂，但伴隨更多係傷感。到耐性用盡一日，就會毅然下定決心，明知艱辛都要踏上move on之路。
「漸漸我再不記得需要你 漸漸我卻自覺沒法捨棄」
被分手嘅一方往往要到失去後先懂得珍惜，先發現自己係咁愛對方。思緒不斷湧出，捨不得放手，日夜想念，渴望重回美好時光，可惜苦苦挽留依然徒勞無功。心中知道自己無資格再續前緣，後悔做過嘅事，但一切已經太遲。
「錯失你 錯在你 往事還銘記 誰清楚當初 鬥什麼晦氣」
從來離別對雙方而言都唔容易，畢竟大家有付出過。奈何造成嘅傷害已無法改變，彼此曾經多親近也好，終會漸行漸遠，成為最熟悉嘅陌路人。只可慢慢接受同習慣孤身一人，過程顧然難受，但唯一解決方法就係等時間過去，讓感覺同傷口慢慢變淡。
「漸漸我已經決心刪去你 偏偏我 不太樂觀因你起」
《漸漸我們》歌手組合新鮮，兩位本身唱悲情歌都非常出色。今次可以話一拍即合，聲線夾，合唱部分唔會太搶，成功將歌中情感昇華，聽到個人都emo埋一份，絕對會成為近代合唱歌嘅代表作。
Edan再次作出新嘗試，將E式情歌味道放入合唱中，使男方帶點卑微嘅揪心更為突出；Jace自《隔離》後終於再出合唱情歌，一如既往地勾起聽眾心底情緒，好有感覺，兩首歌一齊聽有異曲同工之妙。
「身邊日後沒有你 難道我 為證實我輸得起」
個人係非常喜歡男女對唱嘅情歌，因為比起獨唱作更有感染力，完整地唱出雙方心聲，好易代入落故事中。歌詞亦更值得細味，相同字句喺各自角度唱出可以有唔同意思。可惜依類歌曲近年買少見少，希望樂壇未來會有返多啲！
「漸漸我更體貼得不再找你 偏偏我 說到過去心不死」
最後，當年我好鐘意Edan同Jace一齊主持嘅《激安百貨》，明明係購物節目但出到嚟有趣又火花十足。轉眼間兩位已經由新人成長至獨當一面嘅歌手，時間實在過得太快！希望佢地有機會再合作，出返首跳唱歌一定勁正😍
「幸福亦是歪理」
人生中，你又有無試過遺憾地與愛人分開，漸漸地由我們變成我？
《漸漸我們》 Edan 呂爵安 JACE 陳凱詠
曲：Matt Chow, T-Ma
詞：亞木
編：Matt Chow
監：T-Ma
「漸漸我再不記得需要你
漸漸我卻自覺沒法捨棄
無用退避
只不過 難一起(難一起)
再道歉花心機 亦厭膩(再道歉花心機 亦厭膩)
漸漸我已經決心刪去你 偏偏我
不太樂觀因你起(不太樂觀因你起)
無謂顧忌 誰知一刻意氣
只知我被誰遺棄 沒轉機
內傷未及處理」
▼Follow hkpopculturelover
Instagram: https://www.instagram.com/hkpopculturelover/
留言 0