容祖兒(Joey)同關智斌(Kenny)嘅旅遊節目《斌祖二世古》來到最後一集,離開北海道前,他們除了瘋狂買手信,亦展開一段深情對話,原來十年前Kenny寫咗首歌俾祖兒,呢個秘密收埋在Kenny心底十年,到今日先「開箱」,睇住Kenny 寫畀自己嘅歌詞,祖兒感動到眼濕濕。
在往機場的車程上,他們說起何時friend起上嚟,原來因為一起拍攝北京中央電視台的劇集。Kenny說祖兒其實惡唔出樣,又話祖兒在朋友入面是一名「mean精」,祖兒仲講過一句說話令Kenny記足一世,「Kenny你真係好靚仔,不過可惜而家唔興你呢啲樣。」聽番Kenny咁講,祖兒即刻爆笑;至於祖兒就話Kenny一直都冇變過,是「善良的斌」,亦都覺得佢一個人番內地拍劇,係要好毅力先可以捱過,係好值得尊重。
Kenny表示,很記得有年頒獎禮,祖兒呼聲很高拎女歌手獎,但網民話要集氣「噓」佢,頒獎禮當晚宣佈祖兒攞獎時,坐在台下面的Kenny很擔心,當祖兒上台後,真的有人「噓」,祖兒話當年說話比較衝動,「因為覺得有責任去保護我的朋友、同事。」因為呢件事,Kenny就填咗一份歌詞《勇氣情歌》鼓勵祖兒,仲即刻播俾祖兒聽,祖兒邊聽邊細味歌詞,「好多謝你呀寫歌畀我。」
事後祖兒話:「冇諗過佢會識填詞,而且係為我而寫,感動已經唔能夠去形容到我嘅心情。我哋都係睇住對方成長、睇住大家經歷過啲乜,呢份友誼真係好難得。我真係好希望演唱會上可以唱到呢首歌。」Kenny將這個秘密收埋咁耐,因為他比較內斂,亦都覺得唔好意思。十年後將此公諸於世,他感謝公司content team和他一起brainstorm出來。「團隊想我在最後一晚講啲我哋之間發生過而佢唔知嘅事、或者我為佢做過啲乜,我都諗咗好耐先記得番呢件事。如果唔係呢個節目,我真係冇諗住講。」Kenny表示很喜歡填詞,以往每隻碟都會有自己的作品。問到佢仲有乜嘢想同祖兒講,Kenny話不如唱出嚟:「朋友嘅嘢心照啦,我哋好少講出口,我哋通常唱出嚟,希望我再有機會為佢寫隻歌,用歌講俾佢聽。」
撰文:機