李玗蓁《十七年》演衰家姐感「好爽」　嘆無緣廖子妤同場

由廖子妤、楊樂文（Lokman）、陳健朗、李敏等主演的ViuTV劇集《十七年命運週期》，除了有分別飾演李敏與廖子妤年輕版的陳書昕及張可欣夠搶鏡外，還有飾演陳書昕「衰家姐」Rosalyn的李玗蓁（Viann）亦入型入格。

上周劇情講到表面品學優異的「衰家姐」Rosalyn（Viann飾），實質心胸狹窄，更設局捉弄妹妹小青，意外地令妹妹被車撞送院。劇集播出後，不少網民不恥「衰家姐」惡行，在網上鬧爆，面對角色被聲討，李玗蓁直言「愈鬧愈開心」，感覺得到肯定。

現年21歲的李玗蓁，是余香凝、廖子妤的同門師妹，模特兒出身的她，曾客串演出劇集《和解在後》及電影《深宵閃避球》等，今次在劇集《十七年命運週期》飾演「衰家姐」Rosalyn嶄露頭角。對於角色被觀眾鬧爆，李玗蓁表示：「接到劇本時，並沒有擔心角色不討好，反而覺得有發揮空間，是一個挑戰。作為演員，因為飾演唔討好嘅角色而被觀眾討厭，都係一種肯定。其實見到有人鬧個角色，自己感覺有啲爽，哈哈。人生如戲、戲如人生，好開心呢套劇令佢地睇得咁投入，相信觀眾只係討厭角色，唔會討厭我本人。」

李玗蓁在拍攝期間沒有機會與師姐廖子妤同場，直言感到可惜：「同Fish雖然係同一套劇，但沒有同場，可惜沒有合作機會，喺片場亦冇見過面。」李玗蓁表示今次最難忘是拍攝喊戲：「有場戲係我向爸爸坦白自己設計害阿妹，嗰場戲由忐忑內疚不解同不甘，之後轉變做委屈同埋悔恨，好多唔同層次嘅情緒變化，比較複雜，同時轉變得又好快，現場拍咗幾個唔同嘅版本出嚟，喊到最後唔夠水份，淨係得眼水係眼眶打轉，感覺比較有挑戰性。」