無綫《跳躍生命線》自開播以嚟，獲得唔少好評。最新一集亮點就落喺張文慈（Pinky）身上！飾演「麥在田」馬德鐘家姐「麥愛花」、做KOL嘅佢為咗出位咩都做，危坐「春嬌橋」影相打卡，引嚟途人圍觀兼報警！
之後馬德鐘無意間發現佢影咗輯性感床照，質問佢點解影啲咁嘅相時，Pinky含住泡眼淚，鬥氣反駁話「我為青春留倩影！我為人氣、為hit rate」、「我唔做啲嘢會畀人淘汰㗎！」
雖然啲淚水啷吓啷吓，但講對白時依然非常流暢又自然！
馬德鐘越講越激氣，話：「你有冇尊嚴咖？你對唔對得住啊爸啊媽？！」戳中張文慈嘅死穴，終於崩潰。雖然淚流滿面，但堅持冇喊到失聲，仲霸氣嗌走佬，喊戲好有層次，有晒感情起伏，網民都大讚做得好好。
原來係因為佢識咗個賤男，初時兩情相悅，被人影裸照。後來覺得性格不合分手。點知就被對方拎住啲相威脅！為咗先發制人，就自己影一輯性感床照，「寧願畀人話我賣弄性感，都好過畀人話我私生活唔檢點。」
自從亞視「關燈」之後，張文慈就過咗檔去TVB，演出機會唔算多。今次呢個角色希望可以成功入屋啦～
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0