香港樂壇有幾弊？真係唔使多講，由歌手與歌曲的數量，歌曲的流行程度，都是一個客觀指標話畀大家知，真係死死地。曾經是香港樂壇指標，TVB的音樂節目《勁歌金曲》，已淪為星期六晚攝時段節目。咁係咪代表香港樂壇，甚至音樂節目冇得做呢？
要搞清楚一點，TVB製作的音樂節目只代表局部的樂壇，正確地說，其實只係屬於星夢娛樂的樂壇，跟真正的樂壇處於平行時空一樣。雖然有冇限制或封殺，香港樂壇都是難做的。觀乎每年商台的叱咤樂壇頒獎禮，亦見要扭盡六壬，只是想為沉寂的樂壇製造話題。
既然無可為，是否就不為？大約一年前，ViuTV就自家製作音樂節目《Chill Club》，逢星期日晚同大家見面。雖然模式有點似《流行經典50年》，不過邀請的嘉賓較年輕，目標是90、00後的觀眾。而除了賣回憶，每集都有請來新晉歌手獻唱，為大家介紹新面孔，新聲音。
結果節目愈做愈有聲勢，首獲讚賞是製作認真，集集皆由Live Band演奏，然後節目片段不時在網上流傳，這是對家做不到的，你可曾見到李龍基上《流行經典50年》的片段，會流到去你社交平台處？更厲害是由上星期開始，每晚新增「Chill Club推介」，晚晚播幾首全新MV，而去到星期日節目內，又有「Chill Club推介榜」，為觀眾推介10首本地新歌。說穿了，最終目的就是希望可以在來年舉行第五個樂壇頒獎禮，更歡迎派MV到該台播放，甚至出席頒獎禮。
會否成功的確言之尚早，但從業界反應可見是大力支持。其實從整個過程而言，就似一個勵志故事，當人人都潑冷水話你聽無得做時，ViuTV就自己整濕個頭講明想試下，結果在十劃中輕輕已完成三、四撇。要講能殺出困局的關鍵，最明顯分別是有心做與Hea做。而且TVB捧人為親，劇集主題曲必定上榜，必定推介，親生歌手拎硬冠軍歌，就算非親生，友好的唱片公司年終都獲分數個獎項，每每是用關係去決定獎項。
過往大台勢強，唱片公司們只好揸頸就命，但後來愈見情況嚴重，而且旗上歌手往往成為陪襯，出席頒獎禮每每只為營造「公平」假象，令親生仔女得獎添「說服力」，於是各大唱片公司歌手紛紛退出無再簽歌星約，促使《Chill Club》有更多歌手登場，漸變「超級」。所謂物極必反，你以為操控一方便可得天下？當你的節目，你的頒獎禮都欠說服力時，你的確可以繼續鍾意頒畀邊個就邊個，因為根本已經冇人理你。
撰文︰余建
Facebook專頁︰https://www.facebook.com/Stupid.Vie＿
留言 6
雪心
恭喜TVB努力成就別台的節目
講真TVB目的唔係要做好音樂節目
《流行經典50年》係做俾70歲以上睇
《東張西望》已經淪為廣告雜誌
除咗宣傳本台藝人同劇集之外
就淨係會做產品/自身網購平台廣告
然後又再炒晒所有有演技嘅演員
雖然個台係為宣傳政治而「做嘢」
但係當你冇節目冇觀眾嘅時候仲可以點？
睇下當年嘅亞視 就係今日嘅TVB嘅縮影
結果係點… 唔難估到 大家拭目以待
2020年06月02日02:21
大人物
音樂節目好就代表樂壇好？
2020年06月02日04:10
LKH
香港冇樂壇，只有娛樂圈。
2020年06月02日06:14
Ching Wong
請問收視有幾多?
2020年06月02日03:21
C
呢個筆者專捧ViuTV，愛負評TVB。如果要講音樂頒獎禮欠説服力，筆者又唔提下新城！
根本係整個廣東樂壇一瘚不振，唱片公司無心無力，各媒體亦吊鹽水。就算商台，頒獎禮都係靠noice，但欠迴響。
試問，近10年頒獎禮得獎歌，你聽過幾多首？80，90年代嘅廣東歌，唔單止得獎歌，冇得獎嘅都可以啷啷上口。
就算當年廣東歌全盛時期，TVB頒嘅獎或多或少都跟電視劇歌曲有關，跟體得獎歌都跟其他媒體有別。只係當時廣東歌影響力強勁，流行歌太多，每首歌都有大量支持者。
2020年06月02日04:14
顯示全部