【終於成功！】BOYZ九月處男紅館騷confirmed！Kenny身處法國時裝周同樣興奮

去年BOYZ（關智斌、張致恒）在九展舉行首次賣飛音樂會，門票開賣一個鐘頭已經秒速售罄，音樂會當晚全場爆滿，反應叫好叫座。事後歌迷意猶未盡，直言要集氣推他們直上紅館。日前終於有好消息，紅綰已正式批出9月14日檔期俾入行16年的BOYZ舉行佢哋首個紅館演唱會。

BOYZ透過經理人霍汶希（Mani）表示好開心：「啱啱知道攞到期，場數未定，要睇紅館及觀眾反應，我哋出道咗16年，今次係我哋第一個紅館騷，好期待。」Mani興奮同時亦都好頭痕，因為Kenny之前接了兩部電影，與演唱會撞期，Mani話：「本來想推一部，但我哋簽咗約推唔到，佢啲期好緊張，但公司一定會留足夠嘅時間畀佢哋練歌練舞。」問到演唱會上有何驚喜，Mani笑說：「未生銹就繼續打前空翻後空翻，今次係集體回憶，佢哋會唱番經典歌。」她表明公司的師兄師姐，好似謝霆鋒、容祖兒、Twins一定會空巢而出去支持他們。

除了音樂上的好消息，Kenny在時裝界亦有突破，日前他受到品牌邀請，飛到法國參加巴黎時裝周，今次亦是他第一次參加時裝周，看Issey Miyake、Rick Owens、Mihara Yasuhiro及Sacai的show，Kenny坦言受寵若驚：「平時做嘢托賴有好多品牌會俾啲好靚或者當季嘅新款衫俾我着，自己亦一直買好多，之前做騷都會有着，但係真係飛到咁遠去睇個brand成個collection、同埋brand story、真係第一次，所以感覺又新鮮又興奮。」

他直言今次大開眼界，可以看到品牌的整個系列，還可以見到設計師本人。今次巴黎之行，他感受最深是一種共融、世界大同的感覺。「喺呢度見到好多唔同膚色、唔同種族嘅人，佢哋唔會理人嘅眼光，忠於自己嘅穿着態度去表現自己。比起其他城市見到好多一式一樣、大家都要追住某啲潮流好唔同，呢個係我最大嘅感受，喺呢度大家有唔同嘅衣着，但大家又會互相欣賞嘅感覺。」
撰文：二弟