無綫主播伍楚瑩宣布離巢　曾演《溏心風暴》做年輕版鍾嘉欣

無綫出名有唔少美女新聞主播，幾乎位位都係女神級，不過今日（28日）又有位靚女主播離巢，就係財經體育資訊台嘅伍楚瑩（Bonnie），早前透露喺北京清華大學讀高級公共管理碩士課程嘅佢，於社交網晒挨喺無綫採訪車車頭嘅照片，留言：「最後一天出crew了。」並多謝攝影拍檔，網民紛紛留言話好唔捨得，並祝佢前程錦繡。而佢又表示要做番自己，最想做嘅事原來係剪齊陰，仲大上載一張可愛齊陰丸子頭嘅相，少女味濃！

其實Bonnie係童星出身，曾拍過經典電視劇《溏心風暴之家好月圓》中，飾演年輕版嘅于素心（鍾嘉欣飾），於劇中長大後與甘永好（林峯飾）終成眷屬，咁啱佢喺現實中嘅老公又係叫林丰，真係緣分早注定喎，而佢老爺就係天文台前台長林超英。

東網網站 : https://on.cc/東網Facebook專頁 : https://www.facebook.com/onccnews/