Topo Athletic 路跑鞋 Specter 2 | 速度化之作不失穩定性

Topo Athletic 一向俾人感覺係穩穩陣陣，產品唔會有華麗嘅包裝、誇張嘅設計，但就有一份實而不華嘅感覺。著住佢哋嘅跑鞋，會有一份莫名嘅安全感。不過，當知道 Topo 要推出以速度同回彈為核心嘅 Specter 2，不其然會好好奇，究竟佢會係一對點嘅跑鞋?

感謝 Topo 香港代理 Above The Clouds，提供咗一對 Specter 2 俾我哋測試，以下係我哋試跑後嘅簡評。

Topo Specter 2 路跑鞋

基本資料

• 高度: 前掌32mm / 後跟37mm
  

• 落差: 5mm
  

• 重量: 約215克 (男裝 US 9)
  

• 中底: 採用 Pebax 材料，高性能輕量化泡沫材料，可提供高回彈性和能量回饋
  

Topo Specter 2 係針對長距離跑步、速度訓練設計嘅跑鞋，除咗延續 Topo 一貫闊鞋頭設計，上腳非常舒服之外，整體重量亦係輕得驚人，呢個全賴中底物料 Pebax。

核心亮點: Pebax 物料

Specter 2 中底採用 Pebax 物料，佢以輕量見稱，比 TPU 更輕，而且能量流失亦較低，所以營造到又輕又彈嘅跑感。事實上，唔少頂級賽鞋都有採用 Pebax 物料，但點解又無應用喺各類型跑鞋? 原因之一就係成本問題，Pebax 比常見嘅 TPU 及 EVA 都更貴，所以只有頂級跑鞋先會採用。無論係街跑抑或運動場速度跑，Specter 2 回彈性及推進性能都比 Topo 其他路跑鞋有顯著提升。

輕量化的優勢

對於速度訓練/比賽跑而言，Specter 2 男款 US 9 僅重約 215g，屬於輕量之作，絕對有利訓練以至長距離比賽。鞋面採用輕量透氣嘅回收網布，加埋 Topo 標誌性嘅闊鞋頭設計，腳趾唔會有逼夾感，可以自然伸展，彌補到靈活性問題。

足弓承托與穩定性

同其他 Topo 跑鞋相比，Specter 2 亦提升咗足弓承托效果，尤其對足弓較高人士特別有幫助。喺咁多次試跑入面，佢都俾到一個好穩定同順暢嘅感覺，亦即係 Topo 一貫俾到嘅安全感。5mm嘅高低跟差 (heel drop)，對比起其他頂級賽鞋一般嘅8mm，可以話係「微不足道」，而事實上，Specter 2 中底無任何板材，已經說明 Topo 不是要同其他品牌一決速度，更加似係想本身嘅支持者，享受到穩定性之餘，再多一份回彈及速度感。

整體評價

Topo Athletic Specter 2 適合任何對速度有要求嘅人士穿著，相比而言，佢未必係坊間「最快嘅路跑鞋」，更加似係「最穩定嘅快鞋」。Pebax 提供嘅回彈同推進力，係 Specter 2 嘅武器，而支撐住佢嘅，就係 Topo 一貫嘅穩定。

The post Topo Athletic 路跑鞋 Specter 2 | 速度化之作不失穩定性 appeared first on Fitz 運動平台.