歌手泳兒（Vincy）今午（30日）出席主題樂園萬聖節記者會，並配合活動晒唱功，即席獻唱其歌曲《撞到正》。談到「撞鬼」，她透露自己比較膽小，但又喜歡睇恐怖片：「出埠我一定會搵人陪瞓，再唔係就雙連房先得，否則好難瞓得着，唔夠瞓翌日要靠意智力死頂住去做嘢！（有冇試過遇上恐怖嘢？）試過去英國讀聲學，住民宿嘅時候個業主有晚冇返嚟，成間屋得我一個，搞到疑神疑鬼，仲聽到好大嘅響聲，第二朝先發現原來係我個叉電器跌咗落地，哈哈！」
談到拍攝鬼片，她直言開工時聚集很多工作人員，所以反而不害怕：「同埋我發覺鬼片要加咗聲效先恐怖，如果唔係冇乜嘢㗎。咁我都去過墳場拍MV，到埗會禮貌上加個『招呼』先開工。」至於10月16日迎來42歲生日，她透露屆時會去個短旅行慶祝，稍後則會推出新歌：「今次加咗少少自己嘅愛情睇法入隻歌裏面，覺得會係首都幾感動嘅情歌。」
東網網站 : https://on.cc/東網Facebook專頁 : https://www.facebook.com/onccnews/
留言 0