容祖兒謝霆鋒現身上海　逾百粉絲圍觀場面墟冚

藝人謝霆鋒及容祖兒今日陪同經理人公司老闆楊受成現身上海，為旗下珠寶店主持剪綵儀式，吸引大批途人圍觀，場面相當虛冚。祖兒一身白色打扮相當吸睛，更盡騷白滑長腿，而見慣大場面的霆鋒到場時未被人潮嚇窒，淡定地多次向兩旁粉絲打招呼。

談到珠寶設計，霆鋒有自己的一套：「珠寶對於時尚搭配，就好似不斷尋求突破與探索更多可能性一樣，同電影裡嘅動作場面異曲同工，都係希望能令觀眾有耳目一新嘅感覺。而即將上映嘅《海關戰線》係我首次擔任動作導演，對我嚟講都係全新嘅挑戰。」據悉，霆鋒日內將帶着《海》片現身意大利烏甸尼遠東國際電影節，先與歐洲影迷打招呼。

佩戴價值過千萬珠寶首飾閃耀全場的祖兒，受訪時提到即將到來的母親節：「雖然今次行程匆匆，但我頭先都以『九秒九』速度挑選份首飾禮物送給媽咪，搭配一套母女款都唔錯！」而霆鋒及祖兒難得聚首一堂，楊受成表示昨晚已先帶他們去食正宗上海本幫菜「洗塵」。

東網網站 : https://on.cc/東網Facebook專頁 : https://www.facebook.com/onccnews/