嘩嘩嘩～古天樂同阿Kay謝安琪首度合作，推出新歌《（一個男人）一個女人和浴室》！
阿Kay同Juno麥浚龍嘅年度企劃，以董折、浦銘心兩個角色貫穿所有歌同mv，極具追看性，好似一套電影咁！已經先後推出《人妻的偽術》、《勇悍·17》同《一個女人和浴室》等單曲，早前更加係合體開show添！
Juno同Kay合作已久，大家都好有默契，而佢哋合作嘅歌曲成績都好好，近日再有新歌派台，今次更加邀請到影帝古天樂同Kay合唱新歌！
古天樂飾演浦銘心嘅第二任丈夫—藍定凌，同Kay合唱《（一個男人）一個女人和浴室》。
新歌《（一個男人）一個女人和浴室》由BERT作曲、黃偉文作詞、TED LO編曲、麥浚龍同陳哲廬監製，呢個班底已經夠晒吸引，再加上影壇天王x樂壇天后嘅組合，真係無得輸啊！
問到古仔同Juno兩個角色嘅分別時，謝安琪就表示：「古仔所飾演嘅藍定凌同Juno所飾演嘅董折好唔同，藍定凌係個近乎完美嘅男人，佢細心，尊重另一半，尊重愛情，遷就對方。」
Kay仲話今次以大家角色出發去唱歌，有別以往典型唱法，唔再單純只係歌者演繹一首單曲，而係有角色有情緒，相信大家聽歌之後會感同身受，想有個咁好嘅老公。
今次邀請到闊別樂壇多年嘅古仔重返樂壇，原來係因為古仔之前拍攝由Juno執導嘅電影《風林火山》後，大家都對對方非常欣賞，所以促成今次嘅合作。
古仔大讚Juno：「我好欣賞Juno嘅細心，電影上嘅理念同我相似，最難得係肯花時間去做電影。娛樂圈最緊要肯踏出第一步試唔同範疇，去創新唔怕蝕底先可以有新一頁。我唔擅長唱歌，但《一個男人》唔單係首流行曲，係整個故事嘅一部分，一個回憶，我以藍定凌嘅身份去唱，係一個表演，有劇情，好似一部電影咁，所以我試，假如真係拍成電影，我都會期待。」
古仔表示佢對於唱歌好有壓力，但係認為樂壇應該有所突破，佢仲話一首歌唔單止係一首歌，成隻大碟可以變成一個故事都得。而佢好欣賞Juno嘅歌唔只係歌曲咁簡單，而係成個故事。
古仔希望今次嘅合作可以令大家感受到一首歌嘅靈魂除咗透過歌詞、旋律表達之外，仲可以通過影像表達。
而首度合作嘅古仔同Kay都話今次合作非常有趣，Kay仲話要同古仔一齊登台唱新歌添！不過古仔就耍手擰頭：「做咩都得，唔好要我唱live。呢首歌歌詞句句唔同，無重複，我揸起支咪已經好有壓力喇。」認真搞笑啊！
大家係咪都好期待佢哋首合唱歌呢？
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0