CONY每日返工除咗諗放工,第二件事就係諗lunch食乜好(腦細睇我唔到……)。除咗平日食開嘅茶記、米線,有時都會想食好啲,好似食日本菜咁。其實唔少高級食府嘅午市套餐價位相宜,好似位於中環嘅居酒屋「天慶」推出咗全新行政午餐,即使只需百幾蚊就有交易,但菜式卻不馬虎,更不時轉換菜單,確保以最當造食材入饌,亦為各位食家保持新鮮感。
天慶於今年7月開業,處於樓上舖,位置旺中帶靜,而且店內格局寬敞,坐得舒服,想食個放鬆啲嘅lunch就啱晒。午市套餐可選擇$148兩道菜或$198三道菜,好似西餐咁可以因應自己胃口挑選。
前菜可以選擇純素的「麥粒麵豉豆腐」或日式午餐經典前菜「胡麻醬青瓜」,皆是清新怡人。雖然豆腐對中國人而言是平凡不過的食材,但豆腐料理在日本卻能登大雅之堂,更是矜貴嘅高級料理,而呢度嘅「麥粒麵豉豆腐」,亦無丟架,來自日本的豆腐豆香十足,而且口感細滑,以麥粒味噌和牛油果蓉輕輕提味,伴以清甜的昆布湯,沒有喧賓奪主,卻令菜式增添繽紛。
主菜方面,雖然選擇不多,但各式日本料理一應俱全,丼飯、拉麵、熱食統統都有,並以定食方式呈上,附有麵豉湯和小吃漬物,十分豐富。
喜歡食魚生的朋友當然要揀「刺身吞拿魚三文魚籽丼飯」,師傅選用東南海嘅吞拿魚,肥美而柔軟,配搭脆卜卜的北海道三文魚籽,以及飽滿且煙韌的福井縣越光米,成就簡單的美味。至於熱食菜式,CONY首推「松本一口牛」,以A4級松本和牛製成,肥美得來帶少許嚼勁,不會滿口油,伴隨的還有野菜和蒜片。
大家仲可以選擇「魚介湯拉麵」或「汁燒哈利拔魚柳」。CONY一向鍾意魚介湯底,因為相對口感清爽而無咁重口味,呢度選用鰹魚、鯖魚和雞湯,經過兩日熬煮拉麵湯底,濃而不膩。至於哈利拔魚柳(比目魚)以自家熬製的照燒汁,一邊搽一邊燒,皮香肉嫩,伴以炒野菜,更加營養均衡。
如果以上菜式都未能滿足你,可以追加「炙燒醋鯖魚」,將日本真鯖魚以醋醃製,令魚味更重,而且口感更札實,再將表面炙燒增添油香,別具特色。一餐的完結當然唔少得甜品,唔好以為係雪糕糯米糍咁hea,甜品亦是餐廳自家製,雪葩為主,以時令食材製成,CONY今次就品嚐到白桃雪葩伴自家製白桃醬,美味之餘亦能清新味蕾。各位中環上班一族仲唔快啲跟CONY去搵食?
天慶
地址:中環安慶臺1號安慶大廈3樓
電話:2789 3812