特首李家超話香港爭取舉辦矚目嘅大型盛事活動，就好似好嘅女仔好多人追一樣，唔係咁易追得到。當然。首先要讚吓特首喺呢排關於上任兩周年嘅訪問，都係用心去度過諗過點樣可以講得比較入屋，呢個追女仔論就減低咗大家對舉辦盛事嘅期望。但係其實啲盛事都搞咗一段時間，究竟香港係咪要繼續搞落去呢？點樣可以評核到佢嘅成效，同埋真係可以有可持續嘅效果。
香港可能好少人留意喺2015年6月，國家質檢總局同國家標準委聯合發佈左《大型活動可持續性管理體系要求及使用指南》國家標準。我都幾相信香港特區嘅官員都冇乜幾個，真係睇住呢份標準嚟策劃而家洗咗好多公帑嘅大型活動。但係北京舉行冬季奧運會都係用呢套標準模式，去延續活動之後嘅可持續效果。
而家特首都識得講政府主要係搭台，商界係要接力去幫手搞好呢啲活動。但係商界做活動最簡單嘅成效指標就係賺唔賺到錢，都唔使花太多精力去量度計算究竟嗰個活動做得好唔好。但係政府搭台嘅活動就比較虛無縹緲，究竟夜晚喺維多利亞港放完煙火，係咪幫到附近嘅商戶賺到錢？都根本好難量化。
我嘈老闆同老友去半山區帝景園會所食晚飯，除咗嘆佢哋好唔錯嘅前菜之外，特別係佢哋嘅豉油雞做到嫩滑入口又有雞味。但係最重要嘅係我哋傾到究竟香港就算搵到世界級盛事嚟香港舉行，係咪真係有可持續嘅效果。
其實就算簡單到夜晚放煙火，都可以搞一啲延伸嘅活動，就算攝影比賽、拍片比賽或者寫返啲感想喺小紅書，其實呢啲咪可以量化到活動帶嚟嘅成效，仲可以有延伸效果。我都去唔少世界各地嘅國際論壇，好多時開完會，以前就會用電郵群組建立一個開會嘅成員聯繫方法，後來有越來越多嘅社交平台，就算唔同語言來自唔同國家嘅朋友，都可以喺會議之後繼續保持緊密聯絡。
所以話呢俾你追到個好好嘅女仔，都要繼續可以健康咁發展落去，拖到佢隻手先至算係一個里程碑。香港千祈唔好為咗追女仔死纏爛打，俾你追到返嚟用超高成本，最終有乜結局都冇人可以知道。
曹參國
註：專欄作家言論不代表本網立場
密切留意BossMind動向！立即CLS
留言 0