英超星期六早場賽事，紐卡素主場對曼城，紐卡素今季補強動作唔多但穩打穩扎暫時排係聯賽第6名，今日4-3-3陣式，前鋒有伊薩克(Alexander Isak)缺陣，由安東尼哥頓擔任正前鋒，左右兩閘分別由賀爾(Lewis Hall)同查比亞(Kieran Trippier)擔任。曼城方面經歷對阿仙奴嘅大戰後，中場球員洛迪收咧，今日3-2-4-1陣式一對防中為高華錫同列高李維士(Rico Lewis)，進攻組合為基亞利殊、根度簡同貝拿度施華。
上半場紐卡素Low Block防守應對曼城來襲，防守時呈5-4-1陣式，兩翼回防為四人中場防線，三線之間亦相當緊密。曼城進攻時則由中堅艾簡治上一格，同高華錫形成雙防中，其餘球員上前形成6個進攻點，分別企係對方四後衛加防中組成嘅五人防線之間，但礙於對方防線緊密，實際創造機會不多。
相反紐卡素嘅進攻模式大部分都係截到皮球後盡快運向前場打反擊，以右路積及梅菲(Jacob Murphy)出傳中波，但效果不佳。
35分鐘曼城終於打破僵局，左路基亞利殊避過出腳嘅查比亞，二人之間傳到比加維度(Josko Gvardiol)，加維度左腳一cup右腳一燙尾柱入網，為曼城打開紀錄領先一比零。
上半場曼城以一個個人質素嘅入球領先，因為上半場曼城即使有6成控球率同8次射門，Expected Goal只有0.3球。下半場紐卡素雖然人員上無調動，但防線有較為壓前盡量係禁區之外，亦有較多中場爭奪。56分鐘古馬雷斯中路比到直線，安東尼哥頓單刀之時被門將艾達臣係禁區撲跌，十二碼由哥頓操刀射入追平一比一。
80分鐘紐卡素右閘利華文圖曾經落底cut back傳中，中場朗史達夫後上撞射柱邊僅僅出界。同時間曼城換入沙域奧同杜古增強兩邊突破力，不過兩位翼鋒球員都未能成功撕破緊密防線，最終紐卡素主場一比一守和曼城。
紐卡素方面防守部署明確清晰，5-4-1低位防守三線緊密壓縮空間，即使曼城上半場有入球但XG只有0.3已經反映其防守強度。下半場壓前反撲取得成效後其實都有反勝嘅機會，唯獨後備力量有限，場上嘅球員都拼盡全力，包括查比亞、東拿利同祖連頓都相繼踢到抽筋，所以今日呢一分都係球員將士用命拼搏返嚟。
曼城方面今場同時失去洛迪同迪布利兩大主將，以高華錫頂替洛迪都係目前最佳嘅方案，高華錫係防守端都相當穩陣，亦有92%傳球成功率，只係進攻上今日寄望以根度簡為重心，其表現狀態未如理想，令到創造機會嘅責任落喺左翼嘅基亞利殊，確實基亞利殊上半場成功交出一記助攻，但下半場仍然同樣踢法令威脅逐漸減少。整場賽事前80分鐘曼城都顯得進攻乏力，即使後備換入嘅科頓作用不大，只係企係兩線之間等波到，直到80分鐘後換入杜古、沙域奧先有改善，兩位翼鋒實際做出嘅威脅數據上未能直接反映，但其牽引作用加上貝拿度施華移入中路令進攻更多變化，所以或許哥迪奧拿今場太遲作出調動引致失分。
▼Follow 足球港場
Instagram: https://www.instagram.com/footballarena_hk/
留言 0