【轉會傳聞】心灰意冷的簡尼，求才若渴的紅魔

付出十年最寶貴嘅青春，同一手養育自己嘅球會一齊發呢個爭標夢。但夢醒後，發覺呢條路只有自己一個人努力地走，過去嘅付出儼如一泡虛影，人生最難過嘅莫過於此。
十年熱刺生涯，兩次叩關英聯盃決賽，一次打上歐聯決賽，更有幾季時間具備稱霸英超嘅能力，但全部都唔能夠兌換成最後嘅獎盃。作為朗尼之後嘅英格蘭最強中鋒，哈利簡尼（Harry Kane）大概心灰意冷。要離開呢隊管理不善，前路茫茫嘅熱刺，絕對有令人同情之處。

相較起嚟，比起今季陷入混亂嘅熱刺，曼聯新魔頭坦赫（Eric ten Hag）由上季季尾確定執教以嚟，已經一年時間，隊波教到有聲有色，戰術框架同人事紀律都調整過來，目前以63分穩坐第四名，同後面嘅球隊保持幾大嘅分差，歐聯資格應該都指日可待。
權威媒體The Athletic報導，有接近曼聯嘅消息人士認為，坦赫對簡尼虎視耽耽，希望喺嚟緊呢個轉會窗招募佢加盟。而曼聯如果能夠搶到歐聯資格，咁佢哋嘅大約有三億英鎊嘅轉會費上限，足以帶嚟簡尼有突。如果曼聯易主，呢個金額更可能上升。

今季44場波簡尼入咗26球，縱使球隊狀況不佳，佢至少保持到個人輸出，而更重要嘅係佢近呢幾年練出球場大局觀同傳送能力，更加符合坦赫嘅戰術要求。而華舒褔、加拿祖等等嘅前線球員，喺組織上更擅於喺無球嘅狀態吓挨近對方防線，再一個加速突入後方，接應般奴、艾歷臣嘅傳送。
「我哋需要唔單止識入波，仲識連結隊友同參與迫搶嘅球員，呢點好重要。」而事至如今，坦赫對前鋒嘅要求又更高咗。佢四月頭講過，希望手上可以有2個球員每季入到12至15球。華舒褔喺坦赫手下脫胎換骨，受傷之前全季所有賽事入27球，同今季嘅簡尼相去無幾。試想像華舒褔嘅速度同突破力，加上簡尼嘅組織力同把握力，將為曼聯鋒線帶嚟更多元化嘅攻擊模式。

回顧而家陣中嘅球員，馬斯亞狀態飄忽兼多病多痛；華舒褔打翼好過打前；擅於迫搶嘅高中鋒韋賀斯目前由般尼外借加盟，般尼下季直升英超，九成會收返韋賀斯自己用。就算唔簽簡尼，曼聯都需要新嘅中鋒。
除咗簡尼之外，拿玻里嘅奧斯文、法蘭克褔嘅高路梅亞尼，乃至同慕遜加柏季尾完約嘅馬高斯杜林，都係曼聯考慮緊嘅目標人物。但C朗離開之外，曼聯鋒線缺乏星級戰將，有離心嘅簡尼係最直接嘅補強。