昨日曾經出過游學修訪問上半部份，今日來到下半部分，繼續探討《仇老爺爺》，以及劇中的《一臉茫然》。
問：《一臉茫然》帶出咗仇樂秋自覺文藝但觀眾認為諧趣嘅情況。你喺演藝上有冇面對類似嘅問題？點樣諗到《一臉茫然》呢一段出嚟？
答：《一臉茫然》又好，整套《仇老爺爺》又好，裡面嘅愛情戲、工作、爺孫相處上，呢一刻我記憶所及，其實冇一樣嘢係我親身經歷嚟。我諗係一啲感覺、細節去變奏出嚟嘅嘢。
你話《一臉茫然》點解會寫文藝片畀人覺得係喜劇，呢個係一個比較搞笑嘅處理，但我諗更加想講嘅係一種期望落差，以為自己終於會成功但係失敗，呢個先係我想講嘅嘢。我諗嗰種落空，每個人我諗係咪演員都好，都會經歷過呢種感覺，呢樣先係我最想講。
譬如話casting，我未試過畀導演咁mean。但係我入行前都試過畀啲導演無視呀，又要同啲嚟cast嘅女演員對兩次戲，但其實兩次都係女演員發揮嘅戲，我係好似工具咁樣。或者寫《一臉茫然》謝票時，啲觀眾走咗去呀，其實我都有見過啲新演員為咗爭取曝光、爭取機會去謝票嗰時，因為佢哋唔係主角，冇人理你，係好難受嘅。你又要棟喺度，又冇人理你又冇人搵你影相。《一臉茫然》係呢啲感覺嘅變奏嚟。
同埋《一臉茫然》你話點諗到，其實係一個自嘲嚟嘅，因為有啲人都覺得我做戲冇乜表情。
問：《仇老爺爺》你最喜歡邊一段？邊一集出到嚟同你預計嘅效果最相似？
答：好難答，因為好幾場都好鍾意。如果你話邊一場同我心目中效果好貼近，對觀眾同我都好好嘅，我諗係第5集大鬧關愛座嗰場。呢場真係表現到嗰種真實感，一個人係去到有啲失控，然後同成車人去對鬧，一個鬧十個，仲要係好似網絡上你會見到嘅嗰種鬧交，係最貼近到最理想嘅表現效果。
如果話套戲邊樣嘢我係最滿意，我覺得係幾位主角：鵬哥（#盧海鵬）、Candy（#盧巧音）、Yanny（#陳穎欣）、Amy（#盧慧敏）、Brian（#陳安立），我覺得我可以令到佢哋嘅演出賞心悅目，觀眾喜愛，甚至係有經驚嘅。我怕完之後已經好有信心，而觀眾亦都好喜愛，呢個係我好開心同埋好滿意。
問：有咩想同「廢老」、「廢青」講？
答：如果我喺度總結好似浪費咗套戲，希望觀眾可以喺戲裡面搵，咁我就最開心。
問： 監、編、導、演。你最enjoy邊個崗位？今次挑戰咗四合一，嚟緊又會挑戰啲咩？
答：今次四合一係條件所限之下造成。如果你話下一次嘅話，我希望集中做導演，可能寫嗰度就再分多啲出去，演嘅話又唔好自己主演，咁樣去分開。呢套劇，無我嘅場口係好少，呢個都唔係我特登，係各種原因。
我自己唔使演嘅時候，我就係最享受，可以專心去導，我係最享受。譬如蘇豪、許賢佢哋扮食環嗰場、一班女仔dem beat，或者係鄭中基嗰場，我導戲就最enjoy。
問： 嚟緊會喺咩作品見到你呀？有冇籌備緊自己嘅新作品？
答：嚟緊會做一個舞台劇，咁個組合都有驚喜嘅，可以同到ViuTV神劇嘅演員合作，出嚟幾有新鮮感。我自己又有一套電視戲，兩套走埋一齊，都幾好玩。
至於你話創作同導演，就計劃緊、寫緊，亦都搵到大佬喇，但呢個係完咗舞台劇先，因為舞台劇個精神要好專注，咁完咗舞台劇就搞電影。
問： 係咪真係有得睇《一臉茫然》十幾分鐘版本先~
答：《一臉茫然》我會連埋《仇老爺爺》嘅刪剪片或者NG片一齊搞，因為每集嘅時間有限，有好多過癮嘅嘢係可以擺埋出嚟。希望我盡快搞得到。
撰文：方以文（ig: fongemantvman）
留言 0