何伯呢排就勁啦，成個禮拜都有人講緊佢，幾多明星都恨唔到。唯一做到嘅明星，都係老牛嗒嫩草，證明呢條方程式喺香港人嚟講係work！
今次棵草嫩唔嫩，係咪呃錢就費事討論，始終人哋家事，寧教人打仔莫教人分妻，可能係真愛呢。不過100萬，如果拎嚟開食肆，計哂租金裝修設備，應該都係小店為主，係咪最好選擇？之前講過香港食肆死因唔單單係租金，重有顧客體驗，主要就係嘢食好唔好味，有無受不禮貌對待。所以見有啲朋友分享過，做餐廳最好自己人做廚同樓面，保證食物同服務質素相對穩定，如果唔係而家請人難，人手就會成為另一主要成本。而且佢哋無論開住宅區定遊客區，無可避免要面對消費降級同人流減少，價量齊跌情況下，唔知何氏夫婦決定做飲食係咪計好數？
之前何伯拎450萬做定存，當而家一年4厘，一年收18萬息，除開一個月15000銀，對退休人士嚟講，如果無供樓壓力，真係幾舒爽。但既然而家又有家室，想要更高回報，有咩選擇？如果買金，由2014年底金價1183.2美元，到2023年底2072.7美元，10年升咗75%，平均每年升6.4%；同期道指升咗111%，平均每年升8.7%。如果有100萬，都可以入場買下啲債券，呢啲時勢閒閒地有8-9厘。
以飲食業嘅風險情況，掟1球做生做死都未知有無錢賺，而且金主係風險承受能力有限嘅退休老公，何太人品我唔知，但理財同投資判斷真係要提高。
金缸經
註：專欄作家言論不代表本網立場
密切留意BossMind動向！立即CLS