鄧佩儀（Gloria）近日除了首次在新劇《換命真相》擔正做女一外，還有份演出熱播劇《踩過界 II 》其中一單案件，飾演屈「盲俠」王浩信強姦的法律系小師妹 Joanne，劇中Gloria首次挑戰演奸角，不但會爆喊大晒演技，更會瞓身色誘王浩信！
撰文、圖片：東方新地
鄧佩儀挑戰初級奸角色
Gloria透露今次她在《踩過界II》中的角色有點雙重性格，算是奸角，她笑言：「其實一直以來我最希望嘅係演壞女人角色，但我今次嘅角色只係初級奸，當中有幾場戲要色誘王浩信，會有好有女人味嘅一面，希望可以畀到啲新鮮感大家。」
鄧佩儀入行7年機會不斷
加入無綫七年機會不斷的鄧佩儀，多年來拍過唔少TVB重頭劇，雖然一直只演二三線角色，不過，近年有份參演的劇集均有發揮機會，如《鐵探》、《金宵大廈》及《降魔的2.0 》的演出便得到網民不少讚賞，終成功獲監製黃偉聲賞識，安排她在新劇《換命真相》擔演女一。
感情戲連拍兩次有難度 壓力爆煲
第一次擔正做女主角，鄧佩儀早在記者會上興奮報喜：「冇諗過自己可以做呢套劇女主角，有得發揮已經好開心，好似中咗六合彩咁！」不過收到劇本後，鄧佩儀好快由喜變成憂慮。由於在劇中與譚俊彥演一對，兩人甫出場已被安排死去，穿越回到九個月前，劇中譚俊彥要把握時間去拯救鄧佩儀，兩人感情錯綜複雜，劇中有不少感情交集，由於經常穿越時空，兩人的感情戲更經常要連拍兩次，去交代一些變化，相當考演技。據知情者透露：「其實收到劇本之後，Gloria（鄧佩儀）已經好緊張，匿喺屋企研究角色同做筆記，佢從未做過咁深層次嘅感情變化，對佢嚟講真係好大壓力，開拍之後，因為佢嘅戲份好重，每日都有好幾場戲要應付，演出更加力不從心，成日NG，就算拍完啲戲導演都唔收貨，愈緊張就愈做唔到要求！」
譚俊彥、張頴康首當其衝 全劇遲收工
同鄧佩儀最多對手戲的譚俊彥，便首當其衝受拖累，被迫經常重拍。據一名工作人員說：「喺劇入邊Shaun（譚俊彥）同Gloria對手戲好多，知Gloria好大壓力，見Gloria演得唔好而唔開心，都有鼓勵對方，仲專登喺每場戲拍之前同Gloria研究咗先，其實Shaun為咗教佢都搞到自己好大壓力，有時一拍再拍，搞到劇組遲收工，都忍唔住同人呻話要帶住Gloria非常吃力！」而同樣被拖累的還有與鄧佩儀劇中也有不少感情戲的張頴康，因對手失準重拍屢見不鮮，經常被阻遲收工，更試過在片場發火：「唔明點解仲好似新人咁！」被硬捧上女一的鄧佩儀，是禍是福原來只是一線之差！
留言 0