【有片】LINE FRIENDS帶隊　玩轉極光村、獅身像、櫻花橋……

早前同大家介紹過全球首個LINE FRIENDS大型展覽將會登陸澳門，而呢個《LINE FRIENDS WORLD TOUR MACAU 2018》今日終於開幕喇！展覽以旅遊為主題，由Captain BROWN帶大家環遊世界，作為LINE FRIENDS朋友仔，當然要率先去到現場為大家直擊，睇下有咩好玩，同埋有咩影相位！

一次過遊覽世界各地名勝古蹟

現場雖然地方有限，但都劃分了12個區域。遊客從登機開始體驗，落機後由北極玩到埃及，睇完雪又可以睇櫻花！整個展覽中，SALLY最鍾意日本情人橋，因為大家可以走到橋上同BROWN、CONY合照，我又可以做呢對閃爆情侶的電燈膽！展區中又放了多棵櫻花樹，要影呃like照絕對冇問題。

全新造型的LINE FRIENDS角色

今次展覽中登場的LINE FRIENDS角色造型都是經過精心設計，是全球首次亮相，大家要記得搵齊佢哋集郵呀。提提大家，除了大型的座地公仔，會場的牆壁及建築物頂部都會有驚喜，唔好走漏眼呀！

玩小遊戲換禮物

除了影相打卡，現場亦有四個小遊戲大家可以玩，它們分別設於極光村、SALLY獅身像、櫻花情人橋及美國巨‍頭山，集齊四個遊戲的印章可以換到精美禮物一份。所以，入場的時候記得先到聖誕廣場的郵局買本護照，用來儲各區記念印章之餘，遊戲印章亦要蓋在上面。

粉絲必入手會場限地精品

行程最後會去到世界免稅店，店內有極多會場限定商品，SALLY真心覺得好靚，亦忍唔住手買了幾樣。當中的獅身雞面SALLY同獅身熊面BROWN是我其中一樣最喜愛的會場限地精品，除了因為終於冇CONY阻住我哋，亦因為設計特別，頭大身細的公仔造型外面少見，上手亦非常好攬，推介大家去的時候特別留意一下。

門票在《LINE FRIENDS WORLD TOUR MACAU 2018》官方網站公開發售。

展覽日期：2018年7月6日（星期五）至9月2日（星期日） 
地點：澳門新濠影滙「8號轉播廳」
開放時間：
逢星期日至星期四　早上10時至晚上8時
逢星期五、六　早上10時至晚上9時
票價：澳門幣或港幣160元正