《十七年命運週期》大獲好評　平凡人物拍出動人故事

《十七年命運週期》上星期剛剛完結，大獲好評，成功以兩段時期、幾位平凡人物，拍出一個動人故事。

「忘 我沒有很努力要自已去遺忘 那些和日記一起收藏的過往」

劇集以角色為本推進劇情。由青少年時跌碰莽撞中有份青澀快樂，到踏入成人世界後充斥傷感壓抑，甚至對世界絕望，幸好角色間能夠產生出愛與真心。每集睇完總會勾起一點共鳴，湧出滿滿情緒。

「還是害怕夜深人靜時總想起你 還是害怕不經意地聽見你的消息」

剪接穿插兩個時代完全唔混亂，深刻地交代每個角色嘅性格同背景，亦為十七年後作鋪墊及對比。

超人少年時終日笑面迎人，看似無任何壓力。踏出社會後依然深愛番茄，卻太為對方著想而忽略咗自我，一路上背負太多。最後同蕃茄吃過晚餐後遺憾離世，導演再帶觀眾返回佢地甜蜜表白時刻，由結束走回開始，由傷感走到浪漫，虐心至極。依段關係有如此結局，只可以話人生就係咁無常。

番茄比人感覺開朗樂天，可惜年紀輕輕要面對父母離異，成年後又要面對超人離開，更思憶成狂，產生無止境嘅想念與內疚，難以釋懷。幸好有木星同親友在旁，讓傷口慢慢療癒一點，真係得阿Fish先做到咁憂鬱嘅角色。

小青由細到大同樣厭世，但為咗朋友願意付出所有，年輕小青感情戲更做得相當細膩。而木星少年同成年嘅語氣節奏幾乎一樣，木木獨獨但引人注目。

幾位年輕演員嘅表現令人眼前一亮，演得非常吸引，只可以話導演選角功力一流！

「當擁有已經是失去 就勇敢的放棄」

少年時期依條線實在寫得太出色，雖然起初節奏慢但一啲都唔悶，配上營造得好有感覺嘅畫面同氣氛，讓觀眾可以沉浸喺戲劇氛圍中，同時緬懷一下當年嘅時光。

導演亦將舞台劇元素放上銀幕，回力劇社整個排戲同音樂劇情節都勁高質，專業又有新鮮感。結局更以此解開所有伏線同角色嘅心結，為故事畫下圓滿句號。

「然而當愛最後的出口是分離 我會這麼相信 走下去」

十七年間，周遭環境改變了不少，四位主角亦然，雖然多咗份歷練與哀愁，甚至稱得上傷痕纍纍，唯幸依然保留了一點當時嘅稚氣，再次透過戲劇自我救贖。

遊歷過成人世界，誰沒有無形傷疤？

當年嘅夢想你尚記得嗎？當年擁赤子之心嘅你仍然在嗎？

「忘 我沒有很努力要自己去遺忘 遺忘」

最後，刀導從《二月廿九》、《940920》，再走到《十七年命運週期》，三套我都非常喜歡，要屢屢做到一部好作品確實唔容易，希望佢未來有多啲機會一展所長！

▼Follow hkpopculturelover
Instagram: https://www.instagram.com/hkpopculturelover/