岑潔儀帶仔上堂被誤當「姐姐」　拍片斥面試班校長無禮

岑潔儀(Zoey)2012年嫁給馬來西亞富商Dixon後便淡出幕前演出，不過都有經營社交平台。早前她就在社交平台出片，指自己送兒子去面試班上堂，遭一名自稱校長的人呼喝：「姐姐，You come here！」

岑潔儀自爆說自己成日不化妝都被認錯係姐姐，她亦不介意：「但我覺得佢態度好差。我就問佢：『你講乜嘢呀？』咁佢就話：『哦，唔好意思呀，媽咪呀，過嚟呢度簽名。』然後我行去簽名，然後畀下學期嘢我，再送個仔落去。我上番去問佢叫咩名，佢答我：『我係呢度校長呀！』……就算對住姐姐個態度都唔應該咁惡劣啦！我真係打咗個愕然，同埋我要深深再諗阿仔應唔應該再喺呢個面試班上堂囉，我覺得如果佢係呢間學校校長，佢係應該表現出嚟令家長順服或者安心令家長畀小朋友嚟你間學校上堂囉，佢係令我非常之失望！」

之後岑潔儀表示收到留言叫開名面試班：「我話我似姐姐係搞下gag，等大家開心下！令我嬲嬲嘅係，一個所謂校長(面試班都有校長？)佢對姐姐態度係呼呼喝喝(我對我姐姐都唔會咁啦)，一個唔尊重人嘅人竟然做教育，仲係校長？！佢好意思講出口，我真心佩服！仲有一班覺得佢哋好神嘅家長，希望大家要了解清楚先好報名，唔好好似我咁，朋友話好就去，自己應該了解清楚先，學費都好貴嫁嘛！」岑潔儀最後沒有開名，只說是九龍塘很出名的面試班。而最搞笑是她搞網上投票，連老公、細佬都投票佢似姐姐，可能因為岑潔儀其實本身真係擁有1/4泰國血統。