七仙羽師傅（七師傅）近期人氣急升，日前接受車淑梅主持的《舊日的足跡》訪問，節目將於本周日（30日）播出。談到可曾預測自己會爆紅，她坦言十多年前從外國回港做玄學風水師，想以專業形象示人，但因為說話帶有口音，故被指為「騎呢」。她續道：「我喺外國住得耐，比較真性情。講真我無諗過自己咁紅，日日諗住一定唔得，呢啲就好似中六合彩一樣，順其自然。」她自言搞笑都要轉數快，背後付出好多努力，「我讀過博士，其實我一直好想做作家、填詞家。我都係 CASH 香港作曲家及作詞家協會會員，但係當年只係做打手，用其他填詞人嘅名，但好多作品都係非常流行，而且好紅。」
七師傅笑言想為張敬軒作曲填詞，但軒仔好叻，可以一手包辦，所以自問沒有機會了。她大讚軒仔有才華又勤力，更表示好喜歡對方，但對方是大明星，私下沒有交往，避免有緋聞。她笑說：「我諗個個女人都好鍾意佢，嗰次喺紅館佢應承我下一世搵我做老婆。下一世，不過唔知邊一世……但係佢遲早都要做㗎，因為佛經裡面講只要你應承咗，發咗誓，有因一定有果，我無同佢講，唔係因為費事嚇親佢，佢開心都嚟唔切啦！我冇講畀佢聽，因為佢係基督徒。不過我要同鄭欣宜爭佢，因為欣宜話張敬軒都應承咗佢喎！大件事，咁我就有排等！」
有傳言指七師傅曾參加亞洲小姐選舉，她在節目中澄清自己只參加過英國唐人街小姐選舉，並獲得冠軍。她說當年參選者不多，所以很容易得冠軍。「嗰時我好後生，喺嗰度算係靚女，因為靚女比較少。我有健康嘅棕色皮膚，成日著低腰牛仔褲同埋好短嘅衫，長髮及腰好性感，笑容又甜美，所以我喺外國人眼中係一個美人！」
七師傅曾因為有鄉音，做節目時被人用粗口問候，但後來亦因此獲得做廣告代言人的機會，可算是因禍得福。她計劃將「師傅愛你」這句招牌金句寫成一首歌，親自操刀填詞，並自信此曲一定大受歡迎。
立即下載 | 全新《星島頭條》APP : https://bit.ly/3yLrgYZ
留言 0