Nikon Z50II 11月21日香港開賣 平價小升級

臨近年尾，又係外出旅行季節，如果想入手一部旅行相機，Nikon 嘅 Z50II 可能會係唔錯選擇。其實 Z50II 之前已經發佈咗，啱啱就再喺香港正式發佈及公佈發售詳情。新機淨機價係 $7,480 ；連 NIKKOR Z DX 16-50mm f/3.5-6.3 VR 鏡頭套裝就賣 $8,870；邁再加埋Z DX 50-250mm f/4.5-6.3VR 嘅雙鏡套裝就賣 $11,020，已經夠晒去旅行用，影人影景都應付到。

相比上代 Z50 ，今代 Z50II 唔算話有好大嘅升級，但改進嘅地方都好實用。處理器由 EXPEED 6 變成 EXPEED 7，整體速度更快，亦令新機拍片上達到更專業級數，可以拍到 4K60p 、50p、30p ，更可以玩埋方便後製嘅 HLG同N-Log，比上代只可拍 4K 30p勁得多。再加上新增嘅 1秒預拍功能，令今代拍攝功能更完善實用。

另外，上代好多人都鍾意玩嘅 Picture Controls，就由28種，提升到更多嘅31種，可以輕鬆玩到更多效果。而雖然 Z50II 繼續都係冇機身防震，但官方就強調已經改善咗拍片嘅電子防震，實試感覺亦相當唔錯，就算用長焦距手持拍片都可以保持穩定。

其他方面仲有相片加入 HEIF 格式，主體偵測亦由3種大幅增加至 9種。當然亦唔可以唔提螢幕變成可轉式嘅多角度反芒，去旅行自拍就更方便。雖然新機源用上代一樣嘅2090萬像素APSC CMOS ，而現今世代好多人都追求全片幅，不過以咁嘅價錢，玩到以上所講嘅新功能，作為日常用或者旅行用機，我都覺得抵玩同好夠用嘅。

▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/