情人節唔想出街食俾人劏，好多情侶都會選擇留在家中煮返幾味，享受燭光晚餐。不過今年情人節係星期四，上班一族放咗工先可以買餸煮飯，時間緊逼。又，個個都煮嘢食，唔通個個都識煮嘢食咩！好彩而家上網學煮餸好方便，以下幾個食譜，由前菜、主菜到甜品都簡單易整，手殘嘅你都搞得掂，仲好有浪漫氣氛。
前菜：煙三文魚玫瑰多士
雖然呢道菜好似好普通，但完全符合快、靚、正嘅原則，更加唔需要任何烹調技巧， 只需要用現成材料加點裝飾，就能做出造型夠IGable，又感覺浪漫嘅前菜。最重要係咩呀？係唔會搶掉主菜嘅風頭！
主菜：電飯煲慢煮牛扒
牛扒幾乎係情人節必備菜式，不過煎出一塊完美嘅牛扒絕對唔易，如果煎得又韌又嚡好似食橡筋咁，呢個情人節相信都會幾難忘。近日就有位YouTuber教大家用電飯煲製作慢煮牛扒，煮45分鐘，完成後煎香兩邊就完成，更聲稱同用慢煮棒整嘅牛扒冇乜分別。
主菜：士多啤梨燴飯
睇完菜式名，我知你諗咩，做咩教人整暗黑料理呀嘛。必須要澄清一下，呢道菜唔係地獄廚神諗出嚟，而係意大利名廚Gennaro Contaldo嘅食譜。以士多啤梨整出來嘅意大利飯係充滿少女心嘅淡粉紅色，加入洋蔥、牛油和黑醋，味道酸酸甜甜，係一道清新嘅主菜。
有片有真相：2013年名廚Gennaro Contaldo在YouTube分享食譜
主菜：芝士忌廉煙肉帶子蝴蝶粉
如果嫌士多啤梨燴飯太創新，都係想簡單煮個意粉，以下呢個食譜或許會更加啱你。選擇蝴蝶粉而非長身意粉可以營造浪漫甜美的感覺，而且食材都可以預先準備，唔使放工臨急臨忙先買得到。
甜品：士多啤梨布朗尼芭菲
一餐完美嘅燭光晚餐又點少得甜品？好多人都覺得準備甜品好麻煩，但呢款免焗甜品幾乎唔需要任何烹調技巧，只需要將預先準備（或者買）嘅朱古力布朗尼，加入士多啤梨和忌廉芝士，就可以製作出又靚又有心思嘅甜品。
飲品：粉紅雞尾酒
如果整完主菜同甜品都仲有士多啤梨剩，不如用埋嚟整士多啤梨雞尾酒，將整個氛圍進一步提升。
同場加映情人節禮物：抹茶生朱古力
情人節送朱古力係指定動作，如果你仲未準備都唔使緊張，以下呢個食譜不單簡單，仲好似某名牌朱古力，對方一定鍾意。
留言 0