TWINS完成27場中港演唱會　將進發歐美　英國過聖誕節

TWINS蔡卓妍與鍾欣潼昨晚（10月20日）於佛山完成第13場內地巡迴演唱會，加上年頭香港的14場紅館，已經破晒自己紀錄，唱到27場。內地巡唱完結後，下月兩人便開始展開十多場的外地巡唱，包括倫敦、溫哥華，多倫多，拉斯維加斯等地方。

前晚是TWINS內地最後一場演唱會，歌迷特別不捨及瘋狂，從第一首歌就企身跳著，直到散場也不肯坐低。不少歌迷更以特別打扮進場，有人扮古裝，有人扮小丑爆炸頭，又有著睡衣。演唱會完第一部份快歌後，阿嬌見歌迷熱情，已經開始被感動到眼濕濕：「嘩，咩事，一出嚟就已經想喊。」完場時，兩人再也忍不住淚水，到大合唱《唱風箏與風》時，都被感動得不斷抹眼淚。

今年年頭，香港演唱會頭場是阿嬌生日，阿SA為她慶生，叫全場觀眾砌不同顏色的生日牌，昨晚阿嬌亦有驚喜給阿SA，為她印好全場的「蔡卓妍生日快樂」橫幅，於talking位時，請萬多名觀眾高舉生日牌，為阿SA高唱中文版生日歌。阿SA感動地表示：「嘩，咁早慶祝生日….好感動，我爸爸同埋我隻貓呢，都係就快生日，佢兩個都係10月23號生日，咁大家不如送個祝福畀佢哋啦，生日快樂呀。」

阿SA表示，今次內地巡唱後會先小休一下，繼而向北美、加拿大、倫敦等地進發：「真係好唔捨得呀，多謝大家陪我哋一路完成呢個巡演，一路上好多應緩，好多愛。多謝大家陪住我哋走過呢23年！之後我哋去英國、加拿大，唔知會唔會再見到你哋呢？」歌迷就大聲回答，「會呀！」

為了即將展開的外地巡演，阿SA表示已經特別訂製TWINS專屬的行李帶給每個工作人員，亦非常期待去加拿大看尼瓜拉瓜大瀑布，巡到加拿大時便是她的生日，當地朋友已經準備好為她慶祝。阿嬌表示，將會第一次在英國過聖誕節，「諗下係咪有個聖誕特別版的演出，海外場冇依家咁大，同觀眾距離好近，應該會更加開心，或者可以叫佢哋再扮番TWINS造形入場，或者扮聖誕樹，我哋可以揀最佳衣著，著得勁嗰個一樣有大獎。」