ViuTV女主持今早突然暈倒急送院 Win Win楊安妮：發現同死亡好近

ViuTV節目主持Win Win（楊安妮）昨晚出席完《命案》電影首映會後，今日傍晚發出限時動態，表示今早起身去洗手間，突然眼前一黑暈低，全身失去知覺，用盡力量叫了兩句救命，幸好男友聽到發現送她入院。她形容「今朝發現同死亡好近」，又指「短短十分鐘嘅掙扎，好似過一個鐘咁，個身體好似經歷左好多唔同嘅感受咁」，目前留院接受心臟科及肺科醫生檢查，未知最新狀況。

前年參加《全民造星IV》並獲得總決賽第五名，後來加入ViuTV擔任節目主持的Win Win，今日傍晚在IG Story貼出醫院病房的照片，寫道：「今朝發現同死亡好近，一起身去洗手間，眼前一黑就暈低左，訓低係浴缸好恐怖。一開頭意識好薄弱，然後我起極都起唔到身，全身冇晒知覺。」她表示自己用僅餘力量嗌了兩聲救命，幸好男友KC聽到，立即送她入院。

Win Win又憶述：「我不斷掙扎，有少少抖唔到氣，我個刻真係以為自己會死，真係辛苦到好想死，我唔知應該用咩感覺去形容。KC話有一刻以為我鬼上身中，雖然好DRAMATIC，但我真係叫自己唔可以死，所以就算全身冇晒知覺，我都要叫自己死都要爬番起身，唔可以死住，因為我呢世人仲有太多野未做。」

Win Win續道：「雖然爬極都爬唔到，但個下真係好驚，我FEEL到自己出晒汗，呼吸唔到、好痺，短短十分鐘嘅掙扎，好似過一個鐘咁，個身體好似經歷左好多唔同嘅感受咁，我而家諗返起都仲係好驚，好難以置信。」

之後，Win Win再貼了另一張病房相，表示：「然後岩岩先發現，原來我今朝撞到個頭勁痛，依家先feel到，搵左我本身心臟科同肺科醫生檢查中，希望無事。」其後Win Win暫時未有更新狀況。