嚟到今年第二首派台作，Anson Lo再次同徐浩、Wyman合作推出抒情歌，係一首甜到漏既作品，為大家喺繁囂生活中唱出一點溫暖。
「快戒掉晚歸 早點重回樂園 你以後最好 不出我視線」
歌詞道出唔少人既戀愛觀，當踏入關係，就會將所有精神時間花在愛人身上，珍惜每一分相處時光，一秒都唔想分離。只要有對方在身邊，就會感到無比幸福快樂，付出多少都在所不惜。
「世界垃圾崗 很多無聊事情 要快樂滿足 歸家乃捷徑」
我地平日面對外人往往要展現剛強，甚至帶點虛偽一面，但一返到屋企，見到愛侶後，所有包袱都可以一下子放下。藏在深閨中，無需理會世界一切煩惱，做返最真實最舒服既自己，浪漫深情地同另一半訴說心事，輕鬆放空地享受生活。日後只愛對方一個， 一心一意，永不改變。
「共你喜極淚流時 沿途曾受的苦剎那極細」
愛情其實唔駛太轟烈，亦無需理會旁人目光，簡單愉快地朝夕相處已經足夠。一個溫暖笑容、一句親切問候，足已化解任何苦楚，互相扶持，建立彼此既安樂窩，每個人面對風浪時都需要一個專屬舒適圈。
而MV譜寫一段異鄉愛情故事，配上靚人靚景，令歌曲甜蜜更深一分
「唯求共你一愛就到底 唯有一起無可代替」
由《永順街39號》道出分開已久依然遺憾既揪心；《浪漫殺死巨蟹座》明知單戀無結果依然甘心付出既苦浪漫；到《深閨》與愛人獨自避世既甜蜜。
相同曲詞組合既三首情歌，雖然題材截然不同但感覺相似，可以當一個故事嚟感受，投入喺教主既愛情世界。開頭聽或者唔會太深刻，畢竟作品比一般情歌平淡，但欣賞多幾次就會發現歌中情感正一步步唱入心，非常耐聽。
「世上人脈不怕一朝作廢 幸福皆因與你自閉」
其實Anson Lo除咗跳唱歌拿手，情歌同樣不俗，相當啱我口味，演繹亦越嚟越富感情，見到佢既進步，做到以音樂為聽眾們抒發情緒。期待教主下次會搵新班底合作，擦出另一種火花，私心想佢出返首類似《角落生物》既抒情歌！
最後，祝福大家都搵到一個你願意放棄所有，一齊喺深閨纏綿既另一半💕
《深閨》 Anson Lo 盧瀚霆
作曲：徐浩
填詞：黃偉文
編曲：徐浩/黃兆銘
監製：徐浩
「能夠深閨何必入世
告別世俗那虛偽
一生的舞藝
留來夜裏對著你發揮
時間不多何必浪費
拒絕再做凡間千人迷
以後我只專注迷同一位
共你喜極淚流時
沿途曾受的苦剎那極細」
▼Follow hkpopculturelover
Instagram: https://www.instagram.com/hkpopculturelover/