出院即歎茶會播毒？劉少君咁樣解釋…

早前確診新冠肺炎嘅藝人麥德羅與劉少君，兩人先後出院，昨日更相約去酒樓飲茶「慶祝」，而劉少君在出院第2日更已經落街慢跑，點知網友紛紛質疑二人有「播毒」風險，被大鬧自私！

事隔一日，劉少君親身拍片解釋，指二人痊愈後體內已有抗體，唔會再傳染他人：「多謝大家關注我同麥德羅一次會面，大家主要係想了解吓個病情，睇吓點樣喺一、兩個月內令自己嘅心肺可以慢慢咁恢復番原來嘅位置。其實我哋已經有抗體㗎喇，絕對就唔會感染到其他人，大家要放心。」

佢又提到有人問二人病情會否復發？劉少君指要視乎病毒有冇變種：「呢隻病毒暫時我哋依家有抗體，不過如果隻病毒變咗種，可能我哋體內嘅抗體就未必抵抗得到佢變種之後所發生嘅效果，所以我哋成日都要提高警覺，成日都要做柔軟嘅心肺復原，等肺部健康番，我都會同麥德羅、有呢方面知識嘅醫生、朋友去研究點樣去保養。多謝大家關心，如果有受到滋擾嘅，我講聲對唔住，多謝！」

東網網站 : https://on.cc/

東網Facebook專頁 : https://www.facebook.com/onccnews/