泰拳姓「泰」，太極姓「太」，螳螂拳姓「螳」，咁柔道姓咩呢？就係「聖誕」呀！因為又到聖誕⋯⋯每年開聖誕派對最期待嘅一定係交換禮物環節，如果覺得送嚟送去都係類似嘅禮物，不如喺抽禮物方法上搞搞新意思，令過程更刺激，仲可以增加抽到心儀禮物嘅機會呢。
1. 寫上3個特徵俾人揀
每年聖誕交換禮物，人人都希望抽到一份有誠意又實用嘅禮物，不過總會有啲朋友送水杯、護手霜和朱古力等，就算抽中嘅「幸運兒」反晒白眼，都一樣冇得上訴，最後收禮物嘅人又唔開心，又浪費咗件禮物，何必呢。如果想大家都抽到心儀嘅禮物，又想保留返少少神秘感，其實可以讓每個人先在紙條上，寫上自己準備嗰份禮物嘅3個特徵，例如：啡色、甜、食得嘅，然後再進行大抽獎，每個人可以喺3個抽紙條的機會之中，選擇最想得到嘅禮物。過程中可能有人會虛報資料，又或者揀禮物時會錯意，千揀萬揀揀咗個籮底橙。
2. 遲來先搶禮
另一個玩法非常簡單，而且刺激感十足。開始抽獎前，要先排好抽禮物嘅順序，第1個人隨機抽獎後，要即場拆開禮物；第2個人再抽獎後，可以選擇要手上未知嘅禮物，或者搶走第一個人抽到嘅禮物，而被搶走禮物嘅人就再抽一次並直接打開禮物，冇得再搶，如此類推，所以排在最後抽獎嘅人最著數，佢可以搶走前面任何一個人嘅禮物，所以未到最後一刻，都唔知道手上嘅禮物係咪屬於你呢！
3. 一念天堂一念地獄
如果再想玩盡啲，就一定要玩這個「一念天堂一念地獄」嘅交換禮物遊戲。首先，每個人要準備兩份禮物，一份係誠意十足既精美禮品，另外一份就係專門惡搞嘅禮物。接下來可以用抽籤方法決定交換禮物嘅對象，雙方可以先形容自己嘅禮物，識玩一定係不斷吹噓份差嘅禮物，再說服對方用好禮物來交換自己嘅壞禮物。最後有人可能會賺到兩份豪華禮物，亦有人或者會收到兩份垃圾禮物，勁過癮！
4. 聖誕版「開口中」
如果冇時間預備，又想在抽禮物環節之中加添幾分趣味性，可以將掌門人嘅經典遊戲「開口中」融入其中。每個人在準備好嘅禮物上偷偷寫低1個數字，其他人一邊輪流估，出題者一邊縮窄範圍，直至有人開口中，就可以獲得禮物了。這個遊戲雖然比以上嘅方式冇咁刺激，但勝在每個人都能參與到整個過程，投入感更加高。
聖誕交換到心儀嘅禮物當然最開心，就算抽到用唔著嘅禮物，都唔使掉咗佢嘅，可以轉送畀身邊嘅朋友，又或者捐畀有需嘅人，將不需要的禮物轉化成別人的歡樂，又能減少浪費。
留言 0