黃心穎仙杜拉look、馮盈盈嚇人直空裝！台慶女藝人炒車晚裝逐個look

一年一度萬千星輝賀台慶既是城中大事，亦係花旦們爭奇鬥艷爭版面同曝光嘅黃金機會，個個落足心機揀衫試妝，有啲甚至乎借首飾都係為咗靚一晚，不過好多時係就係話題之作，可惜係炒車話題囉！

撰文、圖片：東方新地

黃翠如綠魔聖誕樹

出名仙氣嘅翠如BB，雖然本身笑容甜美討人喜愛，不過穿著方面一直無法駕馭前衞大膽look，今年台慶夜呢個草綠色晚裝配埋個蓬鬆髮型，十足一棵聖誕樹。

王灝兒肥花樽

今年簽約星夢成為親生女，第一次出席台慶嘅JW明顯悉心打扮過，晚裝都係台慶前一晚至由英國空運到港，不過5呎2吋加微胖身形，仲要滿布大媽最愛嘅大花朵圖案，成個肥花樽咁！

高海寧冇腰水桶

明明高Ling愈操愈fit，不過有時事情往往有例外，就算再好本錢，都總有色系同剪裁著上身會成為死穴一刻，22吋腰都可以著到變水桶，前年高Ling呢身台慶look，慘不忍睹！

黃心穎仙杜拉look

19年四月爆出安心醜聞從此斷送演藝前途，亦絕跡台慶，追溯返18年最後一次盛裝出席台慶，黃心穎揀咗呢套復古閃令令仙杜拉歌衫登場，成為個人時裝炒車代表作。

孫慧雪聖誕禮物

38歲孫慧雪明明係城中最fit人母之一，可惜18年台慶未修晒身，加埋揀錯衫，單膊設計加埋大大嘅格仔pattern，又厚又重虎背熊腰，十足大大份聖誕禮物。

馮盈盈嚇人真空

真空唔係人人夠膽著，不過十個有九個著都會出事，港姐冠軍、一向省鏡嘅馮盈盈，三年前勇者無懼真空上陣，不過肉感十足卻美態欠奉。

王君馨扮Janet Bin角色

又係一個信心爆棚想標奇立異，結果由頭到腳都咁失敗嘅反面教材，平時靚慣型開嘅王君馨，17年呢個台慶造型，絕對屬於個人黑歷史首位。刻意梳個蔡少芬喺《飛女正傳》中嘅JanetBin造型，條裙又短到露底，失敗！

陳貝兒窗簾布裝

穿衣一向穩陣又高貴大方，點解18年陳貝兒會揀咗呢一個blingbling聖誕風晚裝行台慶紅地毯，至今都係一個謎，望落去好似成幅聖誕窗簾！

陳瀅毛毛駝鳥

年年都實有一個微胖身形女星，為遮肉著黑衣遮醜不成反而出事，本來甜美又有氣場，陳瀅16年嘅allblacklook著成保險公司經紀咁，西裝褸下一團羽毛，令佢變身一隻鴕鳥。

呂慧儀睡衣大媽

一向出名身材好腳又長嘅呂慧儀，14年生完B啱啱三個月未修得切身，就要復工出席台慶，肥騰騰加上判斷錯誤揀正套睡衣質地大媽風格嘅晚裝，對腳幾長都救唔番！

江嘉敏姊妹裙

自恃青春無敵電力十足，江嘉敏17年信心爆棚，求其以一襲紫色晚裝入去台慶踩場，點知成個造型十足喺金都商場租套姊妹裙一樣。

王卓淇娘爆村姑

家境富裕周身名牌仲有鋪修圖癮，不過有時揀錯衫被影相就後悔都彌補唔到！王卓淇17年呢個look出席台慶，由頭娘到落腳，粉色花花透視裙內襯黃色裙仔係咩玩法，fashion嘅嘢，唔係人人都識。