JW睇貓紙 魏浚笙頻走音 新生代歌手連環甩轆 佢地錯定社會的錯？

1.新生代歌手近期連環甩轆！ JW王灝兒幾年前過檔 #星夢 ，備受TVB力捧，除咗主題曲，連劇都有得做，公司一姐之位都坐得幾穩。不過早幾日《 十大中文金曲頒獎典禮2024 》奪得「優秀流行歌手大獎」後，佢即場演繹半首歌《13歲的天堂》，竟然喺短短2分鐘內，出貓睇咗7次寫喺手掌嘅歌詞貓紙!

2.佢之後仲大模斯樣，主動將掌心雷showoff擺上網當搞笑，即時惹嚟網民圍插，「呢個真係世界級」、「8個月前出歌，今日都記唔到」、「優秀流行歌手優啲乜？」

3.JW終於知衰發文解釋，話啱啱完咗15場《 仙樂飄飄處處聞 》，跟手再有演唱會，啱啱趕得切去頒獎禮，故「背唔晒所有嘢，下次一定背晒佢！」

4.同一個星期， 魏浚笙 Jeffrey亦孖 Edan 、 Marf 、 Jace 亞博開拉闊演唱會。綜觀全晚，Jeffrey自己唱咗5首歌，係最多solo一位，不過網民焦點佢演繹新歌《老積》走音，當時懷疑連佢自己都聽得出，忍唔住搖頭，再加上舞蹈非常生硬，令粉絲都質疑Jeffrey係咪因為早前出席巴黎FashionWeek，致練習不足。

5.Jeffrey表現失準後又喺IG解釋，「 Don’t judge a book by its cover ，難道每次默默練習，都要高調大聲宣布？」又呻私底下花咗好多心機時間去練去學，不過始終冇舞步底，所以令觀眾失望。

6.有網民唔收貨，mean爆話「呢代歌手全部冇謙遜態度」、「努力結果都仲係咁，有無考慮轉行呀?」

7.香港歌壇沉寂好耐，先迎來新生代歌手帶來一個小陽春。喺呢個「人人係歌手」年代，就算自資、或拍片上網都有機會爆紅。不過老土啲講，臨時演員都係演員來嘅！出show前預好時間練歌練舞、令歌迷耳朵懷孕而不是耳朵流產，對拉闊星途將會更好。

▼Follow 娛頭
Facebook: https://www.facebook.com/profile.php?id=61554772610166