上文提要，本地 social run 始祖 Hash House Harriers 逾半世紀前流入本地，屹立至今仍每週飲跑食醉，惟感覺始終自得其樂 indie 嘢，今期睇吓最新兼地道嘅 social run 又點玩法。
近期跑團最愛熱點 – The Station，位於中上環嘅 cafe & bar，打正旗號跑步主題。位置偏離旺區，裝修優雅骨子，有啡有啤有smoothie，文青得嚟帶點中產味(更備有淋浴間供跑友使用，工程進行中)。追源溯始乃衍生自本地跑團 Wazup Running Club。若干年前，酷愛跑步嘅 Andrew 及 Dennis，每週鐵定時間日子相約好友吹水跑。日子有功聚沙成塔，竟由幾丁友發展至幾十及至百人跑，心雄起來放手一搏，獨樂樂不如眾樂樂，當下時勢經營 cafe & bar 招呼跑友，夠薑! 發展至今，每晚特定主題跑，唔使報名唔使約只需出現。社恐嘅你放心，非官方活動日子，即使三九唔識七，儘管大模廝樣行入去，放低書包跑個夠，跑完攞袋拍籮柚，拜拜你條尾。水都唔幫襯一杯會否被重睥? 「真心無所謂真心想你跑吓步!」Dennis話嘅，有片為証!
逢周三晚嘅 urban run，嘢嘢百幾友，咩人都有，sub 3 嘅、休閑嘅、新入坑嘅、爛玩爛飲嘅……唔講披醒唔講快慢，輕輕鬆鬆中西海濱6/ 7k，齊齊整整跑完飲兩杯，嘻嘻哈哈又一晚，熾熱氣氛媲美數街之隔嘅老蘭!
如此豪爽豁達之經營作風除引嚟跑友跑團之垂青，更令一眾運動品牌與之聯乘活動。預約包場活動聽聞已排緊隊。
真心折服嘅反而係，喺各方媒體不斷推介北上消費指南嘅同時，卻耳聞目睹此地餐廳酒吧陸續結業嘅境況，竟有兩條傻佬單純因喜歡跑步而建構如此獨特場所予跑友們聚首交流，市井啲問句 :「條數點計㗎?」須知道 Andrew 及 Dennis 並唔係一味跑少少飲多多嘅吹水跑友，各大小路賽山賽均見其蹤影，實質為認真跑手。難得費煞心思以糖衣包裝氹您喜歡跑步愛上跑步，又或者，恆常課表令您透不過氣，嚟呢度歇一歇，教練應該無詐型。
但肯肯定，營運 The Station 需有心有力有愛有閒情之餘 (錢就唔使講啦)，其實，仲要有種!
在 Instagram 查看這則貼文
The post 尋找跑會的故事 #07 | The Station．糖衣包裝但身心有益 appeared first on Fitz 運動平台.
留言 0