MIRROR 12位成員一同主演的新電影《12怪盜》昨日舉行首映，各人以黑衫黑褲現身，當然現場亦都有大量鏡粉撐場，尖叫聲勢極大。而MIRROR接受訪問時，亦都被問到謝票場有約400場，鏡粉已經開始撲飛的情況。
攝影：楊媛
陳卓賢(Ian)就回應表示其實可能有接近500場，至於被稱為「謝票王」的呂爵安(Edan)及盧瀚霆(Anson Lo)就指因為自己比較空閒，所以參與謝票機會最多。而之前訪問時提到，達到一定票房，柳應廷(Jer)及Anson Lo會跳〈Fever〉，Jer就回應指自己「守身如玉」，Anson Lo就提到自己除謝票外，都接了新戲，而且新戲更會由杜棋峯執導，他表示會為角色剪頭髮及落妝演出：「自己都未試過咁素顏演出。當然好緊張，好大壓力，但杜Sir幾nice，因為仲係拍第一組戲，佢仲guide緊我點入戲，就咁聽佢講嘢都學到好多嘢。」隊長楊樂文(Lokman)則表示只要大家支持，會有好多福利。
至於鏡粉排隊撲飛，Ian就表示自己心痛fans要搶飛。而謝票場最少的江𤒹生(AK)，則因為接了新戲，不過暫時未能透露詳情，只知是運動題材。