【聖誕節】另類佳節歌單　故事爆笑轉折勁過《羅生門》

見到街上五光十色嘅燈飾，就知道聖誕節又到了，唔少人會同家人食聖誕大餐，或者同一大班朋友開party狂歡一晚，亦有人選擇同伴侶外出旅遊，過個白色聖誕，唯獨是單身人士可能仲苦惱緊，今年係咪要唱住Lonely Christmas同Single Bell過⋯⋯其實單身過聖誕都唔一定要咁慘情，以下推介5首另類聖誕歌，有冇伴嘅你都可以聽住嚟過一個開心聖誕！

1. ToNick - Last Christmas

如果要數經典聖誕歌，不得不提外國組合Wham！在1984年推出嘅《Last Christmas》，不少人氣巨星，包括Taylor Swift和Ariana Grande也曾經翻唱過這首膾炙人口嘅經典金曲，而香港樂隊ToNick也早在2011年就改編過這首神曲，除咗混合了幾首聖誕歌旋律，歌詞內容亦非常搞笑，講述好兄弟Joe為了追女仔而向自己借錢，後來發現Joe約嘅正正是自己嘅女神，隔年仲發現佢已經結咗婚，仲生咗BB，嬲到主角唱出「我wish你仔仔沒籮柚」，非常抵死又搞笑！

2. ToNick - This Christmas

這首《Last Christmas》過了8年，原來故事仲未完結！ToNick昨晚喺YouTube上載咗續集《This Christmas》，主角今年喺尖沙咀busking，仲遇到一個欣賞自己嘅小朋友聽眾，後來仲借咗錢畀呢位小朋友去買雪糕，點知佢杯雪糕係買畀個女仔，即時令主角諗起被好兄弟Joe背叛一事而變得好激動，仲嚇到小朋友當場喊，最後小朋友父母出現，竟然就係Joe同當年嘅女神，主角最後大暴走，誓要追番當年筆數！劇情神展開，令唔少歌迷聽得過癮，仲留言問：「個仔仔有冇籮柚？」唔知道ToNick下年會唔會出多首《Next Christmas》湊成聖誕三步曲呢？

3. C AllStar - 白色信件

如果唔想聽搞笑，想增加返些少浪漫氣氛，至啱聽C AllStar《白色信件》。唔少人會趁聖誕節向暗戀對象寫心意卡，這首歌正正表達了送信人心中嘅思念同愛意。歌曲描述了一個白皚皚雪地嘅畫面，只係幻想都已經覺得好浪漫，再加上由四子和諧嘅歌聲唱出，無論單身與否，都能夠感受當中甜絲絲嘅感覺，唔止聖誕節，成個冬天都啱聽！

4. 謝安琪 - 愁人節

無論係情人節定聖誕節，都會經常聽到一句歌詞：街裡愛人一對對。這句歌詞出自謝安琪《愁人節》，好多人以為又是另一首《Lonely Christmas》，但只要細味歌詞，就會發現佢並唔係一首情歌，而係一首反思節日意義嘅作品，鼓勵大家在盡情購物消費和玩樂嘅同時，都多點關心露宿者、獨居老人等弱勢社群，將節日嘅祝福分享開去。

5. 麥兜 - 噢聖誕樹

好多人都覺得隨著年紀愈大，聖誕節就愈來愈冇氣氛。為咗回憶童年時代嘅聖誕節，一定要聽麥兜電影入面嘅《噢聖誕樹》，這首歌改編自《O Christmas Tree》，廣東話改編歌詞非常生活化，而且充滿童真，亦係香港人嘅集體回憶之一，每年回帶都會令人會心微笑呢。