回顧2024年我最喜歡的十首廣東歌　陪香港人渡過高低起跌

2024轉眼過去，今年樂壇話題不少，相當熱鬧，依舊有數之不盡嘅高質廣東歌，實在係樂迷福氣。

一如既往我喺眾多作品中，挑選咗十首最喜歡嘅。每個單位只有一首，純粹個人喜好，絕對主觀，排名不分先後。

「沿途望出車外 是盛放的戀愛 而我有個秘密亦無害」《黑玻璃》洪嘉豪
愛情其實無需同任何人交代比較，平淡快樂就足夠。《黑玻璃》正正帶大家隨心寫意地出走一趟，與愛人喺車廂中，懶理外間所有事物，專心沉醉喺二人獨有嘅空間，創造屬於彼此嘅回憶，世界只有對方，有時幸福就係咁簡單。作品演繹同MV瀟灑型格中唱出甜蜜愛意，男人同院長一樣可以好浪漫🧡

「徒手挑戰過 幸福的意義 先叫做青春」《至少做一件離譜的事》Kiri T
愛上一個人時，就算過程崎嶇，仍然會不顧一切地追尋，甚至明知依份任性會令自己受傷，都在所不惜，無人可以阻止。失敗也好，最少有無悔地嘗試過。愛情可以令人變得瘋狂，青春本該如此，人生亦如是。你又有無勇氣為愛做一件離譜的事？❤️‍🔥

「愚蠢的我 喜歡你 偽造默契 偽造甜蜜 做場甚麼戲」《以孤獨命名》Ian 陳卓賢
當一段情開始消逝，彼此卻繼續演一齣關係依舊之感情戲，燃燒僅餘嘅愛，逐步迎向終結。曾經美好嘅時光，依刻已成為痛心回憶，更無可避免地要面對沉重嘅孤獨感。愛情就係如此殘酷，愛得多深，痛得多重。Ian今年嘅五部曲故事實在太出色💙

「淪落在同一都市 仍有浪漫憧憬 創傷的盡頭 有美好的風景」《七點半鐘的陽光》MC 張天賦
歌曲道出一個戀上陌生人嘅故事，每日默默等待對方出現，渴望能送上一份安慰，可惜無能為力，亦深知唔會有結果。即使只係單方面邂逅，對方甚至唔知你所在，但都稱得上係一份緣，情感依然可以相當轟烈。愛情，你信就係真，係越聽越有味道嘅作品🥲

「世界是很荒誕 未可改變至少可以共你一起 別散」 《念》 陳蕾
喺依個都市，生活實在太壓迫，當負面情緒出現時，往往好似搵唔到出口，離快樂越嚟越遠。人會傷春悲秋其實正常不過，就讓自己傷心，無需抗拒。即使此刻睇唔到前路，只要妥善處理情緒，終能夠望見光明。絕望無助之際，謹記仲有依首作品陪伴你渡過🫂

「多少的往事終給抱憾淹浸 將灑脫在心內幽禁」《普渡眾生》林家謙
面對至親離世，要接受確實困難，係要到永別一刻回首，先發現彼此有咁多遺憾，原來曾經嘅恩怨係如此微不足道，可惜生死有命，我地無法阻止。人死後要超渡，在生嘅人又何嘗唔係喺苦海沉淪。珍惜眼前人，好好照顧自己，或者就係最好嘅「破」地獄方法。家謙把聲太適合首歌，將電影情緒完美昇華🥹

「我已經 很很不愛 狠狠不愛 但願別追問」《我很不愛你》陳健安
有種愛係為求彼此關係不變，情願壓抑內心想法，都要留喺對方身邊，因為明白一但表露心意就無法回頭。甚至要傾聽對方訴說同別人嘅愛情煩惱，其實自己同樣面對，諷刺又難受。曾經嘗試狠心地磨滅愛意，但又談何容易。保持親近卻又遙遠嘅關係，最少可以用朋友角色默默守護在旁。愛並唔一定要擁有，學習放手地愛或者係人生無奈但必經一課💔

「一次的錯愛 不阻你到後來 被愛」《Let go》Nancy Kwai
當與深愛嘅人分開，世界彷彿一下子塌陷。知道係時候放手，重拾生活，重新習慣照顧自己。然而，要真正做到係相當艱難，過去嘅快樂與回憶仍然在內心悸動，但已無法再經歷，個種痛心係筆墨難以形容，有多痛就證明你曾經有多愛。就讓時間成為醫治傷心嘅良藥，終有一日可以走出陰霾，迎接更幸福關係💖

「解答不了手足無措 所以當我想休眠時 別要 再報導」《間歇性休眠》Jace 陳凱詠
身處依個社會，每日辛勞過活，盲目追名逐利，難免變得迷惘。每日除咗身心俱疲之外無任何感受，彷彿成為一個無靈魂嘅機器，非常痛苦。其實人生係咪一定要名成利就？嘗試對自己寬容一點，見攰就唞，花點時間傾聽內心，或者你真正想要嘅野係好簡單🙂‍↕️

「你最迷人的性格 源自你 被擊倒 的那天 起身再戰」《數到十》 Lolly Talk
人生難免會遇上挫折失敗，彷似面對絕對，睇唔到希望。不過，同拳擊比賽一樣，一日未數到十，都仲有翻身嘅可能。保持一顆永不放棄嘅決心，拼盡全力撐過去，堅持到底，終有一日可以見到希望。就同依班女仔一樣，漂亮地打出一場逆轉勝✊

感謝廣東歌再次陪伴我同一眾樂迷渡過2024嘅高低起跌，2025繼續多多指教🫶

你嘅年度歌曲又係邊首？Comment話我知！

下面有多十首我同樣喜歡嘅遺珠作品，介紹埋比大家欣賞：
《You’re Gone》應智越 @mr_littlecat
《緊急應變逃生法》 Pandora樂隊 @pandorahk_official
《左手香》 陳葦璇 @hahakirac
《我們只有一往直前》sica @j.sicasi
《後來知道了》張蔓姿 @gigiicheung
《回憶半分鐘》Cloud 雲浩影 @cloudwann
《我們之間的花期不是永遠》 Cozy Syndrome @cozy_syndrome
《瘋子》 The Hertz @thehertzofficial
《Alright》 Tiger 邱傲然 @tiger_yny
《細間始終你好》張蔓莎 @sabrinasa

▼Follow hkpopculturelover
Instagram: https://www.instagram.com/hkpopculturelover/