Ray Online｜江玉歡試夾公仔3次都臨到出口鬆爪　斥取巧手法影響消費者信心

夾公仔機近年喺香港開到成行成市，選委界立法會議員江玉歡(Doreen)最近就收到唔少市民投訴，話坊間好多機嘅公仔擺位及夾架嘅鬆緊度，都有嚴重做手腳之嫌，即使夾到公仔最後個爪都會鬆，換言之夾到公仔嘅機會微乎其微，形容漂亮嘅公仔只係吸引顧客燒錢嘅門面技巧。

出口約一個手掌距離鬆爪

Doreen噚日就親自去銅鑼灣一間夾公仔店體驗，佢入咗20元玩4次，其中3次都夾到公仔，但不約而同地臨門一腳都喺出口前大約一個手掌嘅距離鬆爪。香港社會零售市面仍然有待恢復，Doreen就話用呢啲取巧嘅方式做生意，的確會為營商形象同消費者信心造成負面影響，建議政府多啲巡查呢類舖頭，甚至參考外國經驗作出規管，以免有不法商人「欺騙」市民。