針對新冠肺炎疫情對環球經濟造成的嚴重打擊，美國聯儲局於本月初（3月3日）宣布減息0.5厘，聯邦基金利率目標範圍降至1厘至1.25厘。事隔不到兩星期，聯儲局在3月16日再宣布下調聯邦基金利率，由1厘至1.25厘，下調1厘，至0至0.25厘，並重新啟動量化寬鬆（QE），以應對新冠肺炎疫情對環球經濟造成的影響。
兔兔：熊大，美國聯儲局短短兩個星期減息兩次，仲要減成1.5厘，係咪史無前例的做法？
熊大：係呀。咁短時間減息兩次，仲要減幅咁大，真係聞所未聞。想當年金融海嘯，美國聯儲局只係減息半厘，即使當年美國次按問題導致股市急跌，聯儲局都係減息0.75厘，今次減息1.5厘，仲要QE放埋水，可見疫情問題真係好嚴峻，令美國政府不得不出盡辦法救市、救經濟。
兔兔：咁其實減息對各行各業有咩影響？
熊大：任何一個國家，利率高或低，都會影響企業做生意的成本。舉個例子，利率高的時候，企業做生意的借貸成本就會提高，呢個時候做生意就會比較難，投資自然就會減少。相反，利率低的時候，企業做生意的借貸成本就會降低，令商家更容易做生意或者投資。簡單嚟講，低利率有助紓緩企業喺資金上的壓力，從而帶動國家經濟增長。
兔兔：美國減息係咪對本地樓市有利？我見中原樓價領先指數（CCL）對比去年同期仍有超過2%的升幅。
熊大：理論上，利率低的時候，買樓借貸成本會下跌，按揭供款減少會令市場資金轉至樓市。假設借款人每月薪金不變，利率低的時候向銀行借到的錢會比利率高的時候多，從而增加入市買樓的意欲。
熊大續說：不過睇返歷史資料，本地息率走勢唔一定同美國一致。想當年美國開展加息周期，香港都冇跟足加息。而目前美國宣布大幅減息，估計未來港元拆息都有機會下跌，令供樓人士受惠。但港元拆息唔會歸零，港美息差一定有溢價。當年美國加息周期開始時，唔少人都預期香港樓價會下跌，不過當年樓價冇跌之餘之後仲要不斷創新高，可見息率同樓價走勢唔一定成反比。理論上美國減息係有機會令市場資金轉至樓市，令樓市交投活躍，不過呢個情況又唔一定會出現。
兔兔：如果本地真係跟隨美國減息，咁銀行的定期存款計劃係咪冇晒吸引力？
熊大：當然！利率高就話放錢入銀行做定期收息啫，利率低的話做咩仲要放錢入銀行做定期？近日個市跌得咁急，好多股份的股息率都比銀行定期存款的利率更吸引。
兔兔：散戶愛股匯豐控股（5.HK）近日跌到有成9厘息，好似好吸引喎！
熊大：銀行的息口敏感度一向好高，減息會直接影響銀行的息差收入，對其盈利表現造成影響。所以唔好貪匯豐高息就盲舂舂衝去買呀，小心有「賺息蝕價」的風險！
兔兔：咁市面上的收息股仲有咩好選擇？
熊大：揀收息股的時候，唔單止要睇派息比率，仲要睇間公司有冇持續派息的能力。因為一旦公司某一年收入或盈利大減，就有可能減少派息。如果想搵比較穩陣的收息股，公用股、房托股係唔錯的選擇，例如香港電訊 （6823.HK） 、中電 （2.HK）等。
不過小編奉勸大家一句：近日環球股市跌得咁急，想入市都係睇定啲先好。