Ray Online｜鄧家彪再收「攬女」合成照　指「老婆得啖笑」

多位立法會議員成為騙徒目標，上星期收到合成床照被勒索。事隔1星期，多位男議員再收到同另一個女人嘅合成床照。工聯會立法會議員鄧家彪繼續未驚過，除咗同警方備案，仲同咗老婆備案，話老婆得啖笑。

鄧家彪噚日收到嚟自內地嘅電郵，附上佢「攬女」嘅合成相，相中嘅「鄧家彪」攬女之餘，仲要對住鏡頭笑，可信度似乎唔係太高。而喺相側邊就放咗隻USB手指，騙徒話鄧家彪收到影片截圖之後，如果唔及時聯絡佢解決，就會交畀委託人公布影片。佢揚言「一旦視頻和資料到了互聯網平台，對你的影響是巨大的，之後不是我所能控制的，相信你也不希望這件事情影響到你的家庭及事業，過時不候，後果自負！」

指「老婆得啖笑」

鄧家彪向傳媒表示好彩唔係得佢收到床照，佢覺得騙徒係專程搜尋立法會議員嘅電郵，再改圖。佢話大家都知道係造假，老婆都得啖笑。而今次騙徒嘅電郵地址嚟自內地，鄧家彪希望香港警方同內地執法部門合作，將騙徒繩之於法。

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)