周吉佩望啟動巡唱　向公司反映爭取演戲機會

歌手周吉佩（吉吉）與蘇志威，下午現身啟德為慈善活動站台，席間二人不約而同大爆自己是「大富翁」高手，蘇志威更試過參加比賽，差一名位置便可代表香港到外國出戰。而活動上吉吉吸引大批粉絲到場舉牌支持，場面熱鬧。

吉吉事後透露目前正籌備屬於自己的網上節目：「帶大家去飲飲食食，我發覺呢類題材嘅節目，真係好多人睇，好似我之前帶啲小朋友去深圳飲食，出咗啲相關嘅貼文回響都好大。（你柴人哋台喎。）我係指有進步空間啫。」

至於新年願望，吉吉坦言：「希望啟動巡唱，澳門同廣州都係我鎖定嘅目標，同埋都想試吓拍劇。（從未試過演戲？）係呀，不過有人睇完我嘅MV，覺得我都幾演得，嚟緊會同公司反映吓，爭取機會。（想挑戰啲咩角色？）其實乜都冇所謂，好想試吓拍打戲，千祈唔好叫我演喊戲就得，我份人好難喊得出，可能性格比較樂觀同開心，呢方面真係要向太太請教，佢以前有經驗嘛。」

東網網站 : https://on.cc/東網Facebook專頁 : https://www.facebook.com/onccnews/