憑《全民造星IV》出道的樂壇新人榛綦(Natalie)繼早前推出派台歌《旅程多得你守望》後，今日再推出新歌《第一零一次再見》，今次MV除了落足本飛赴台灣拍攝外，更專程邀請逾6呎高的台灣型男黃柏峰擔任男主角，與嬌小的Natalie組成「最萌身高差」。
Natalie為今次新歌飛抵台灣拍攝MV，初嘗出埠拍攝滋味，她表示：「覺得好喜悅，可以到台灣拍攝，畫面所有嘢都好靚，喺戶外拍攝時，天氣都好好，我係一個見到靚嘢會超級開心嘅人，所以拍出嚟係好靚，希望大家會鍾意。」不過今次台灣之旅，由於拍攝時間緊湊，Natalie每晚收工都要去便利店吃飯團醫肚，無暇品嘗台灣地道美食。
除了出埠拍攝，今次MV特別之處，更專誠邀請身形高挑的台灣型男黃柏峰擔任男主角，首次跟對方合作，Natalie坦言最難忘二人的身高差距：「對方同我身高相差成30cm，我企喺度去唔到對方膊頭，所以幾難忘，我哋一齊企喺度嘅話，唔知個鏡頭會唔會同框唔到，身高差太多，好搞笑。」問到Natalie與黃柏峰在MV中可有親密鏡頭時，她謂：「都有啲比較親密，企close啲、個頭close啲咁，有啲場面都有啲尷尬，始終第一次合作，初初開始都需要時間去互相熟悉，而佢都好友善。」MV拍攝前，導演擔心拍攝經驗不多的Natalie難以入戲，特別安排人員到場為她指導情緒演繹，豈料Natalie埋位拍第一個鏡頭已交足戲，令導演及在場工作人員大感驚訝，大讚她有演戲天分。
提到「最萌身高差」，身形嬌小的Natalie，可會接受追求者身高逾她30cm? 她謂：「我接受到30cm嘅身高差，好似都幾可愛吖，不過我希望追求者唔好太進取，因為太進取我會有啲壓力，所以比較鍾意性格含蓄啲，等大家透過傾偈慢慢去了解對方。」
東網網站 : https://on.cc/東網Facebook專頁 : https://www.facebook.com/onccnews/
留言 0