高鐵香港段嘅動臥列車噚日傍晚首航，運輸及物流局局長林世雄有份試搭去北京嘅班次，佢喺晚餐時段就同立法會交通事務委員會主席陳恒鑌、港鐵公司常務總監—香港客運服務楊美珍同企業事務及品牌總監蔡少綿，一齊去到和諧號嘅8號餐卡食飯。Ray喺列車上面就發現，為咗慶祝首航列車開出，餐卡入面都布置咗唔少氣球裝飾同橫額，開車一段時間之後亦發現有好多乘客一齊嚟食晚餐。
動臥列車上面有咩食？林世雄就喺餐牌上面，揀咗個最貴、價值68元人民幣嘅杏鮑菇燒牛肉飯。佢試食完之後就大讚個飯有牛肉味，亦都有好多配菜，又話食物質素好可靠，高過佢期望咁話喎！餐牌上面仲有其他食物，包括飯盒、飲品同雪糕，售價就由15元至68元人民幣不等。如果唔想好似局長咁親自出嚟嗌嘢食，乘客亦可以喺臥鋪房掃描二維碼落單，之後就會有專人送上食物。
全程車話晒都要大約12個半鐘，究竟林世雄中間會唔會瞓陣覺？佢就強調瞓覺係動臥列車嘅體驗，瞓就一定會瞓，但就話列車差唔多去到石家莊站嘅時候，列車就會睇到日出，仲話要約埋記者清晨4點一齊去餐卡睇日出，不見不散喎！
原文刊登於 AM730
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)
留言 0