紅隧係香港最早開通嘅海底隧道，早喺1969年動工，1972年通車。新民黨立法會議員容海恩關注紅隧幾十年嚟都係差唔多樣，用白底黑字，佢建議加添彩色燈光美化設施。
立法會今日討論有關紅隧收費廣場規劃嘅 口頭質詢，容海恩發言嗰陣話收費廣場已經變成歷史文物，但望返紅隧幾十年都係白底黑字設計。出年會舉辦全國運動會，容海恩話紅隧好近啟德體育園，5分鐘車程就去到。佢希望紅隧可以配合運動、「日夜繽紛」等主題，加設彩色燈光同其他裝飾等美化設施，令成個城市規劃更加靚。
林世雄認為有經典味應保留
運輸及物流局局長林世雄舉例喺內地城市會到啲有味道嘅古舊建築，而紅隧正正唔係現代建築。佢覺得「海底隧道」呢幾粒字有Classic（經典）嘅味道，更加應該保留。至於紅隧周遭，林世雄認同可以加添裝飾，令香港洋溢盛事氣氛。不過，佢強調紅隧始終係馬路邊，美化嘅同時需要考慮交通安全。
原文刊登於 AM730
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)
留言 0