對於大專生來說，返學的樂趣除了是吸收新知識（應該係、除非唔係），精心打扮都係重點之一。然而每朝出門口都分秒必爭，聰明女生就會選擇前一晚準備定，方便自己翌日可以極速出門。預早揀好衫褲鞋襪是基本菜，不過原來頭都可以早一晚偷步準備，只要睡前用少少時間盤頭髮，瞓醒即可擁有美美的波浪頭！CHOCO都明白其實整住個頭瞓覺不太舒服，但如果翌日有想悉心打扮的活動，試試以下方法都未嘗不可。而且全部都不用卷髮器，能避免傷害頭髮。
仿自然捲曲－睡得最舒服的三股辮捲法
相信大部分姊妹都試過紥三股辮，每次散髮後頭髮都會自然捲曲。不過其捲曲度較密集，未必個個都鍾意，所以大家可以利用兩條頭巾或手巾仔，總之較薄的布料，增加頭髮的弧度，編出一個較自然的髮型。先把頭髮分為左右兩半，然後在耳仔附近的頭髮加入對摺了的頭巾，再以平常編三股辮的方法完成。
浪漫又唯美的大波浪－適合較長頭髮的姊姊
公主風的大波浪頭髮予人可愛的感覺，原來用襪子都可以捲出來。先把襪頭位置剪開，把它捲成冬甩型備用。然後把頭髮束成高馬尾，建議紮於頭頂位置，減少睡覺時頂住引致不適。最後，在髮尾套上冬甩型襪圈，慢慢把頭髮從內到外捲到頭頂。不過此方法較適合長頭髮的朋友使用，剪了層次或短髮用就會飛散得難以控制。
韓系美人魚捲髮－手殘女都可捲出性感造型
美人魚捲具個性，去party最適合不過。其實只要利用髮帶即可輕易完成，對手殘女來說簡直是福音。首先把髮帶套在頭上，然後分別把左右兩半頭髮一邊繞一邊纏入髮帶，把所有頭髮收入髮帶內就ok！
凌亂慵懶風－中短頭髮姊妹都啱用
以上方法其實中短頭髮的姊妹較難使用，所以就要用上可以貼近髮根的方法來捲髮。先把頭髮以「田」字方式分成四份，再紥成小辮子。之後各條辮子自捲成為波形，並以橡筋固定。不過此方法睡覺時就會較為辛苦，使用前要留意呀。
第二朝睡醒拆開辮子，再以手指微微摷鬆頭髮即可出街。想加強捲髮持久度，可以用上髮泥或噴髮膠以作固定。