你可能不知道的生活小物用途 超神奇！呢幾樣嘢居然可以咁用？

你到底係咪真係識用你手頭上嘅生活小物？設計系嘅朋友可能會好有同感，產品嘅每一個細節都係經設計師諗過度過，每一個設計嘅出現都希望可以服務到佢嘅使用者，今日小編就為大家帶嚟六個你日日都會用，但你未必知道佢原來仲可以咁用嘅生活小物！一齊去下面睇下你到底用得啱唔啱啦！

圖片來源：網絡圖片、YouTube @BrightSide、Twitter @merompans、Urbanshop、Making.com｜撰文：Aster

生活小物（一）—— 一次性筷子

疫情底下成日都會嗌外賣食，一次性筷子緊係用唔少，食食下嘢要空隻手出嚟做嘢又唔想直接放檯面咁污糟點算好？原來一次性筷子仲可以當筷子架用！小編同大家一樣都慣咗向兩邊用力「啪」開筷子，其實仲有一個小妙招，只要將黐埋一齊嘅筷子頭直接拗落嚟咁就可以得到一個筷子架，唔用筷子嘅時候就可以先放置喺呢個筷子架上面，又方便又衛生，唔洗另外揾地方放！釋放你嘅雙手！

生活小物（二）—— 馬克杯

唔知大家有冇留意過馬克杯嘅杯底，有啲杯底係有個開口，但絕對唔係瑕疵品，而係用心設計過㗎～有咗呢個開口之後可以方便用家喺潮濕嘅地方固定好隻杯，唔驚佢會自己滑走！除此之外，呢個設計仲可以避免馬克杯放入洗碗機清洗後留有積水，有個小開口將水排走，超級貼心同人性化！

生活小物（三）—— 咖啡外賣紙杯

平時見到啲咖啡外賣紙杯間間鋪頭都差唔多，形狀都係上闊下窄，原來入面係大有學問㗎！闊身嘅紙杯上緣預留咗足夠嘅位置，當你飲用咖啡嘅時候自然唔會掂到個鼻，造成不便；下窄嘅設計可以畀任何尺寸嘅手輕鬆攞住，就連手細嘅人都可以一手掌握！而且呢種設計令紙杯可以堆疊，更加方便收納～

生活小物（四）—— 調味罐

倒調味料嘅時候成日倒唔出或者倒得唔平均相信都係唔少人嘅煩惱，呢個時候調味罐底部嘅坑紋就大有用處啦！只要廚房齊備兩個調味罐，將其中一樽倒轉，兩個樽底部互相打圈磨擦，就會產生震動令調味料順利撒出，而且仲會倒得好均勻，唔會一時好多一時好少！快啲記啲呢個秘訣試下啦！

生活小物（五）—— 購物車

去親超市買嘢都會將隨身手袋放埋落去購物車減輕下負擔，推咗咁耐手推車你又知唔知設計師一早幫你考慮咗呢個需要？推開手推車入面嘅嬰兒座位就會有一個購物車環可以用作掛鉤，等使用者係購物嘅同時可以合理安放選購嘅產品同隨身物品，將食材同個人物品分開擺放，夠晒衛生！

生活小物（六）—— 軟膏

一啲藥用軟膏通常都會用塑膠膜或者錫箔封口，密封嘅設計唔係咁易打開，好多人都會用牙籤甚是係指甲戳破封口，但其實仲有個更快捷嘅方法！軟膏蓋嘅尖端就係為開封軟膏而設計，只要簡單反轉軟膏蓋，將尖頭刺入封口即可輕易打開軟膏，唔洗整污糟對手或者另外揾工具幫手！

——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/