鄧炳強考試曾「肥佬冧班」終以最佳學員畢業　鼓勵文憑試考生不要放棄理想｜Ray Online

中學文憑試7月中放榜，保安局局長鄧炳強今日喺分享會上，用自己曾經「肥佬冧班」，但最終決心堅持，以最佳學員畢業嘅經歷，鼓勵考生遇到挫折唔好輕易放棄。

鄧炳強分享嗰陣提到大家可能覺得佢好成功，先後擔任警務處處長同局長，其實中間都經歷好多失敗。佢話投考督察期間，每2至3個月就要考試，其中一次實務考試題目，問應該點樣捉到跑去森林的賊人，當時他答話追到去森林。不過正確做法應該係包圍森林搜索，結果考試「肥佬」，仲面臨「冧班」。佢當時諗「明明以前讀書唔錯，搞到要冧班好似好醜」，令佢一度想放棄做警察。

提醒「天生我材必有用」

好彩鄧炳強得到一位同輩鼓勵，提醒佢想成為警察除暴安良嘅初心，而唔係為追求成績優異。最終鄧炳強喺臨畢業前嘅6科考試中，科科都考第1，更加以最佳學員畢業。佢鼓勵應屆文憑試考生唔好輕易放棄，應該存有希望之心。他又話「天生我材必有用」，鼓勵考生唔好妄自菲薄。

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)