自從美國加息周期開始，資金成本貴咗好多，連帶錢都流走咗唔少；大陸內房高債務問題，令大陸經濟受衝擊，普通人消費力減少，連帶落嚟香港買樓嘅大陸資金都少咗；同埋香港防疫措施太過嚴苛，都趕走唔少外國企業，呢啲企業好多expats，隱性為香港樓市需求打底。
而家香港經濟差咗，住屋需求細咗，地產商日子自然無咁好，誠哥啲樓重要越賣越平，直頭無形中夾埋其他地產商。所以債務重啲嗰堆，畀市場借啲意係咁鋤，甚至同恒大碧桂園相題並論，問心個債務比例差咁遠都要咁講，明顯就唔係以事論事。之後重要講佢哋借唔到錢，或者十幾廿厘咁借，總之好似無得救咁。如果有人喺製造恐慌嗰陣造淡地產商股票債券，嗰排真係賺唔少。
最近新鴻基向23間大陸、國際同本地銀行組成嘅銀團，借230億港紙，再大鑼大鼓出新聞稿，附加一張大合照，就係為咗同全世界講，出面吹到佢哋有幾差都好，我個230億港紙銀團都有近5倍超額認購。
呢啲銀團個利率估計都唔會特別高，我當SOFR+5%好未？都係10厘左右，至少同嗰陣市場吹嘅20厘差好遠。而且佢最新份中期業績，財務支出按年多咗5億，基礎溢利少咗5億，其他都無乜大變，即係情況咁差，營運上都無太大問題，只係畀財務支出蠶食利潤。就算香港情況再差，呢啲過百億過千億市值嘅企業要一夜冧咗，就有啲不切實際。
當然有啲人會話，佢份中報寫得返79億現金，比6個月前少咗一半喎，所以而家咪借咗230億返嚟囉；又有啲人可能會話，呢230億都要還，係要還，但可以到時用新銀團還舊銀團嘅。而且聯儲局主席鮑威爾都講，應該都唔會再加息，即係財務成本都計到數，咁就少啲風險。
唔好搞錯，唔係話地產商好好景，投資者都要睇返整體環境，尤其香港越嚟越融入內地，超高地價可以維持幾耐premium，2047地契問題，都要考慮埋。但唔應該刻意製造混亂，令其他人蒙受不必要損失。
金缸經
註：專欄作家言論不代表本網立場
密切留意BossMind動向！立即CLS
留言 0