微辣前藝人R見面會被嫌收費貴　回應與古天樂比較：我值得

YouTube頻道微辣前經理人阿晶去年7月因患上抑鬱症及疑被欺凌而輕生，事件令微辣暫停更新，旗下藝人被抵制紛紛「潛水」。事隔一年多，藝人們陸續露面，個別經營社交平台。其中成員李熙媛（Rosalina，R），將在周六（9月21日）舉行見面會，與粉絲見面，不過被網民指收費太貴。

網上流傳的見面報名表格顯示，見面會將在九龍舉行，費用每位980元。安排公布後，R表示收到不少私訊，不滿收費過高。她昨日（9月18日）在Instagram長文作出回應。

R在長文中指，這是邏輯性問題，更以古天樂開見面會為比喻：「其實呢個就係每個人，自己評估價值既（嘅）問題，係（喺）我角度，我會想像古天樂開見會面（ 見面會），我時間啱價錢啱，我就會比（畀）錢去見佢。（我拎自己同古天樂比？Yes! Why not? 佢係人，我又係人）」

她又表示，價錢代表自己在別人心中的價值：「我標價越高，我搵到既（嘅）同頻越一致。因為係（喺）你心目中，我值得」。

R又表示這是供求問題，自己無法影響任何人：「我覺得我絕對值呢個價格，我仲只會越黎（來）越貴，因為我每日都進步緊，我每日都係更好既（嘅）自己。我既（嘅）時間同能量好寶貴，我會留返比（畀）值得既（嘅）人。」

網民就批評她自視過高：「自己唔尷尬先好嘢」、「又活係自己世界」、「會唔會自視高左（咗）？」。有網民貼出人氣AV女優河北彩伽 (前名：河北彩花) 的見面會價錢表作比較，指價錢還比R的見面會收費更便宜：「搵河北彩花仲好」。