前無綫新聞主播金盈同前明珠台主播男友Jeff Tang拍拖4年，感情穩定，趁住情人節合力整愛心朱古力，實行過番個甜甜蜜蜜嘅節日，見金盈不時「命令」男友，而男友亦言聽計從，聽晒女友吩咐，佢話：「收到朋友嘅酒，濃度有成53度，我自己同佢唔係飲開酒，所以用嚟整甜品，點知發現用嚟整甜品非常之好，個個食完都讚不絕口，所以今次同男朋友一齊整。」又大讚「處男下海」嘅Jeff，表現值70分：「始終佢都係第一次整，雖然佢有時唔係好聽指示，但作為一個初學者，真係表現得唔錯。」
而Jeff又大讚女朋友整朱古力一流：「我同佢啲酒量都好差，飲啤酒同紅酒飲少少都會嘔，但呢隻酒心朱古力，覺得真係好好食，所以要求佢教我整同整多啲，因為我好雞手鴨腳。」
拍拖4年，雖然感覺已經係老夫老妻，但趁住情人節大放閃光彈，互相大讚對方優點，金盈說：「Jeff份人好老實，好有大志。佢係一個好有計劃嘅人，有好長遠嘅打算。」而男方則大讚女友為人夠真不造作，心地善良。
東網網站 : https://on.cc/
東網Facebook專頁 : https://www.facebook.com/onccnews/
留言 0